ДХХ Тошкент шаҳри ва Тошкент вилоятида қалбаки 71,2 минг долларнинг муомалага киритилишига чек қўйди

Давлат хавфсизлик хизмати ходимлари томонидан Тошкент шаҳри ва Тошкент вилоятида қалбаки долларнинг муомалага киритилишига чек қўйилди.

Қайд этилишича, ДХХнинг Тошкент шаҳар бўйича бошқармаси ходимлари томонидан Бош прокуратура ҳузуридаги департамент ва шаҳар ИИББ билан ҳамкорликда тезкор тадбир ўтказилган. Тошкент шаҳрида яшовчи 30 ва 22 ёшли икки нафар шахс ҳар бир қалбаки АҚШ долларини 7500 сўмдан ҳисоблаб, харидорга қалбаки 18,8 минг долларни 141 миллион сўмга сотган вақтида ушланган. Шунингдек, улардан қўшимча қалбаки 9,5 минг доллар ҳам ашёвий далил сифатида олинган.

Давлат хавфсизлик хизматининг Тошкент вилояти бўйича бошқармаси ходимлари томонидан ички ишлар органлари билан ҳамкорликда Оҳангарон туманида ўтказилган тезкор тадбирда, Фарғона вилоятининг Олтиариқ туманида яшовчи, муқаддам одам савдоси билан боғлиқ жинояти учун судланиб, ҳозирда пробация назоратида бўлган 27 ёшли шахс қалбаки 20 минг долларни ҳақиқий 14 минг долларга сотишга келишиб, харидорга қалбаки 12 минг долларни берган вақтида ашёвий далиллар билан ушланган.

Шунингдек, унинг яшаш хонадонидан ҳам қалбаки 400 доллар тегишли тартибда расмийлаштириб олинган.

Тезкор тадбир давомида, воқеа жойига бирга келган унинг шериги – Олтиариқ туманида яшовчи, муқаддам судланган 24 ёшли фуқаро бошқарувидаги Nexia русумли автомашина кўздан кечирилганда, унинг салонида ҳам қалбаки 10,5 минг АҚШ доллари борлиги маълум бўлган. Тезкор тадбир натижасида жами қалбаки 22,9 минг доллар процессуал тартибда расмийлаштириб олинган.

Бундан ташқари, Тошкент туманида ўтказилган тезкор тадбирда Андижон вилоятида яшовчи 44 ва 25 ёшли икки нафар шахс ҳар бир қалбаки 100 долларни ҳақиқий 40 доллардан ҳисоблаб, харидорга қалбаки 20 минг долларни ҳақиқий 8 минг АҚШ долларига сотган вақтида ашёвий далиллар билан қўлга олинган.

Ҳозирда мазкур шахсларга нисбатан жиноят ишлари қўзғатилган.

Бундан олдин Навоий вилояти ИИБ ТҚХ Жиноят қидирув бўлими, ДХХ Навоий вилояти бошқармаси ва департамент ходимлари билан ҳамкорликда ўтказилган тезкор тадбирда жиноий гуруҳ томонидан 400 миллион сўм сохта пуллар 160 миллион сўм ҳақиқий пулларга алмаштирилаётган пайтда қўлга олинганди. Апрель бошларида эса Тошкент шаҳри Янгиҳаёт туманида харидор қалбаки пулга iPhone сотиб олгани, Тошкент вилояти Ангрен шаҳрида қалбаки пуллар муомалага киритилишининг олди олингани тўғрисида хабар берилганди.