Қозоғистон президенти Қосим-Жўмарт Тўқаев аҳоли миграцияси ва жиноий ижро тизимига оид қонунчиликка киритилган ўзгартиришларни маъқуллади. Бу ҳақда Оқўрда матбуот хизмати хабар берди.
Қонун бўйича:
- жазони ижро этиш тизими муассасалари, тергов изоляторлари, вақтинча сақлаш ҳибсхоналаридаги видеокузатув тизимларига зарар етказганлик учун жиноий жавобгарлик белгиланди;
- ҳукумат томонидан белгиланган ҳудудларга кўчиб ўтаётган шахсларга деҳқон ёки фермер хўжалиги юритиш учун ер участкалари берилади;
- кўчирилган шахсларга ва уларнинг оила аъзоларига кўчиб ўтганлик учун субсидиялар, уй-жой ижараси харажатларини қоплаш, коммунал хизматлар учун тўловлар, шунингдек, иқтисодий ҳаракатчанлик сертификатлари тарзида моддий ёрдам кўрсатиш кўзда тутилган;
- вояга етмаганларнинг жинсий дахлсизлигига қарши жиноятлар содир этиш, давлат тили, Қозоғистон Конституцияси асослари, тарихни фан ва олий таълим соҳасидаги ваколатли орган томонидан белгиланган даражада билмаслик Қозоғистон фуқаролигига қабул қилишни рад этиш ва қайта тикламасликка асос бўлади.
- кўп марталик инвестор визаси ва талабгор касб эгалари учун Қозоғистонда доимий яшаш учун рухсатнома олиш ҳуқуқини берувчи визалар жорий этилди.
Экстремистик ёки террористик ташкилотга алоқадор, такроран жиноят содир этган, уюшган гуруҳ (жиноий ташкилот) таркибида етакчи мавқени эгаллаган, вояга етмаганларнинг жинсий дахлсизлигига қарши жиноятлар содир этган шахслар, шунингдек, Қозоғистонда оғир ёки ўта оғир жиноят содир этган ва халқаро шартномалар асосида ватанига қайтарилганларнинг Қозоғистонга кириши тақиқланди.
Қонунда аҳоли миграцияси соҳасидаги қонунчиликни янада такомиллаштиришга қаратилган бошқа тузатишлар ҳам назарда тутилган.
Изоҳ (0)