Қозоғистон туризм ва спорт вазири Ермек Маржикпаев Вазирлар маҳкамаси йиғилишида чет эллик сайёҳларни мамлакатга қандай жалб қилиш ҳақида гапирди. Бу ҳақда Nur.kz хабар берди.
Туризм вазирлиги раҳбари сайёҳларнинг шикоятлари асосан виза ва миграция режими масалалари билан боғлиқлигини айтди. Маржикпаев виза олиш тартиб-қоидаларини рақамлаштириш ва соддалаштириш орқали ечим топиш мумкинлигини таъкидлади.
“Манфаатдор давлат идоралари билан биргаликда хорижий фуқаролар учун Neo Nomad Visa’ни жорий этиш, уларга мамлакатда узоқ муддатга қолиш ҳуқуқини бериш масаласи кўриб чиқилмоқда. Ушбу чорани амалга оширишдан кутилаётган иқтисодий самара йилига 3 миллиард тенгедан ортиқни (салкам 6,8 миллион доллар) ташкил қилади. Ҳозирда Neo Nomad Visa’ни жорий қилиш механизми ишлаб чиқилиб, манфаатдор давлат органларига юборилди”, — деди вазир.
Эслатиб ўтамиз, февраль ойи охирида Қозоғистон паспорти Марказий Осиёда энг кучлиларидан бири экани маълум бўлди: дунё давлатлари паспортларининг кучлилиги рейтингида у 54-ўринда турган. Ўзбекистон ва Қирғизистон Гамбия, Уганда ва Ҳиндистон билан бирга 73-ўринни эгаллаган. Туркманистон эса Мали билан биргаликда 77-ўринни қайд этганди.
Изоҳ (0)