Исроил ҳарбийлари 15 май куни Ғарбий Соҳилда рейд ўтказиб, 20 нафар фаластинликни ҳибсга олган. Бу ҳақда Al Jazeera нашри хабар берди.
Тинч аҳоли вакилларининг ҳибсга олиниши ҳақида дастлаб Фаластин маҳбуслар жамияти хабар берган. Рейдлар 14 май куни кечки пайт бошланган.
Ғарбий Соҳил ҳудудининг қатор аҳоли пунктлари Исроил томонидан назорат қилиниши хабар берилган. Ҳудудга сўнгги йилларда исроиллик кўчманчиларнинг оқиб келиши бир неча баробар кўпайган.
Сўнгги рейдларда ҳибсга олинган 20 нафар фуқаронинг икки нафари вояга етмаган бола ҳамда яна икки нафари собиқ маҳбуслар экани билдирилган.
Ҳибсдагилар орасида аёллар ҳам бўлган.
Исроил аскарлари, асосан, Ғарбий Соҳилнинг Хеврон туманида рейдлар олиб борган. Тулкарим, Байтлаҳм, Қалқиля ва Қуддус атрофларида ҳам қамоққа олишлар кузатилган.
Al Jazeera маълумотларига кўра, 7 октябрдан бери Ғарбий Соҳилда Исроил ҳарбийлари томонидан ҳибсга олинганларнинг умумий сони 8745 нафарга етган. Рейдларда жами 498 киши ҳалок бўлган. Улардан 124 нафари болалар ва 7 нафари аёллар бўлган.
Изоҳ (0)