Кремль АҚШнинг Россиядан уран импортини тақиқлашини “адолатсиз рақобат” деб атаб, глобал бизнесни ривожлантиришда давом этишини қўшимча қилди. Бу ҳақда The Moscow Times хабар берди.
Хабарга кўра, Россиянинг Росатом агентлиги Вашингтоннинг ҳаракатларини камситиш ва бозорга оид бўлмаган қарор деб ҳисоблаган.
АҚШ президенти Жо Байден 13 май куни Россиядан бойитилган уран импортини тақиқловчи қонунни имзолаган эди.
Хабарда тақиқ Москванинг Украинадаги “махсус ҳарбий операцияси” даромадини чеклашга қаратилгани, 90 кундан кейин кучга кириши айтилган.
Бу адолатсиз рақобат. Бизнинг атом саноатимиз дунёдаги энг илғор соҳалардан бири, у ниҳоятда рақобатбардош, биз бу соҳани ривожлантиришда давом этамиз, — дейди Россия президенти матбуот котиби Дмитрий Песков.
Маълумот учун, АҚШ атом электр станциялари бойитилган ураннинг тахминан 24 фоизини Россиядан олади.
Песковнинг таъкидлашича, Америкаликлар учун халқаро майдонда Россия билан рақобат қилиши қийин.
АҚШда қабул қилинган қонунни биз камситувчи ва бозорга мос келмайдиган қонун деб ҳисоблаймиз. Кўриниб турибдики, сиёсий тусга эга бўлган бундай қарорлар жаҳон ядровий ёқилғи бозорининг барқарор ишлаши учун ҳалокатлидир, — дейди Росатом давлат корпорацияси.
Росатом ҳисоб-китобларига кўра, 2022 йилда у 35% улуш билан бойитилган уран бозоридаги энг йирик иштирокчи бўлган ҳамда уран ишлаб чиқариш ва захиралари бўйича дунёда 2-ўринни эгаллаган.
Изоҳ (0)