Россия мунтазам равишда Буюк Британия Украинага етказиб бермоқчи бўлган, Кремл раҳбари Владимир Путин “ядровий компонентга эга қуроллар” деб атаганига ўхшаш уранга бойитилган снарядлардан фойдаланган. Бу ҳақда Newsweek хабар берди.
.jpg)
Айрим рус ҳарбийлари Россия Қуролли кучларнинг баъзи танклари худди шундай ўқ-дорилар билан жиҳозланганини айтган. 21 март куни Британия Мудофаа вазирлиги вакили Аннабел Голди “Челленжер 2” танклари билан бир қаторда Украинага снарядлар, жумладан, таркибида уранга бойитилган снарядлар етказиб бериш режалаштирилаётганини айтди.
Бойитилган уран ядро ёқилғисининг қўшимча маҳсулоти бўлиб, юқори зичлилиги сабабли ҳарбий мақсадларда, жумладан, танк снарядларида ҳам қўлланилади. Бундай ўқ-дориларнинг зичлиги қўрғошиндан 70 фоизга юқори, улар волфрам ва титан билан қотишмада ишлатилиши мумкин. Британия Мудофаа вазирлиги ҳам замонавий танклар ва зирҳли техникаларни мағлуб этишда уран снарядларининг юқори самарадорлигини қайд этади.
Россия президенти Владимир Путин бунга муносабат билдирган ҳолда улар “ядровий компонентга эга қуроллар” бўлиб, улар Украинага етказиб берилса, Россия бунга жавоб қайтариши мумкинлигини айтган.
“Британия армияси ўнлаб йиллар давомида ўзининг зирҳли снарядларида урандан фойдаланиб келган. Бу стандарт элемент бўлиб, ядро қуролига алоқаси йўқ. Россия ҳам бу ҳақда билади ва атайлаб нотўғри маълумот беради”, — деган мамлакат Мудофаа вазирлиги.
Россиянинг уранга бойитилган снарядлари
АҚШ Мудофаа вазирлиги Россиянинг ҳам уранга бойитилган ўқ-дорилари захираси борлигини маълум қилди.
“Албатта, руслар ҳам улардан кенг фойдаланади”, — деди Британия ва НАТОнинг Кимёвий, биологик, радиологик ва ядровий мудофаа кучлари собиқ қўмондони, истеъфодаги полковник Ҳамиш де Бреттон-Гордон.
“Россияда уранга бойитилган ўқ-дорилар Британия Украинага етказиб берадиган ўқ-дориларга ўхшашдир”, — дейди ҳарбий технологиялар бўйича эксперт Девид Хемблинг.
Халқаро стратегик тадқиқотлар институти ходими Уилям Алберкнинг таъкидлашича, Россия 1982 йилдан буён бир неча турдаги уранли танк ўқ-дориларини, жумладан “Свитец” снарйдалар турини ишлатиб келмоқда.
Newsweek нашрининг ёзишича, Россия оммавий ахборот воситалари уранга бойитилган ўқ-дорилари билан жиҳозланиши мумкин бўлган, модернизация қилинган рус Т-80БВ танклари ҳақидаги маълумотларни эълон қилган.
2018 йилда россиялик экспертлардан бири “ТАСС” агентлигига берган интервьюсида бундай ўқ-дорилардан фойдаланиш халқаро стандартларга зид эмаслигини айтган. “Ўша йили Россиянинг бошқа давлат ОАВлари ҳам бу ҳақда ёзган”, — дейилади хабарда.
Изоҳ (0)