Украинада бешта асосий сабабга кўра, уруш даврида сайлов ўтказиш мумкин эмас. Бу ҳақда Украина президенти офиси раҳбари маслаҳатчиси Михаил Подоляк маълум қилди.
“Биринчидан, бизда ҳақиқатан ҳам ҳарбий ҳолат мавжуд. Иккинчидан, фронтда бўлаётган воқеаларга алоқадор миллионлаб одамлар бор. У ерда сайловларни ташкил этиш деярли мумкин эмас. Президент бу ҳақда аниқ айтди — хандақда ўтира оладиган кузатувчилар борми”, — деди Подоляк.
Иккинчи сабаб, дейди сиёсатчи, Россиянинг доимий ҳужумлари, бу одамлар хавфсизлигини таъминлашни қийинлаштиради. Учинчи компонент — ташвиқот.
“Қандай қилиб сайловолди ташвиқотини олиб бориш керак? Бизда шартнома асосидаги эмас, сафарбар қилинган армия бор. Одамлар ўз номзодини илгари суришга, маълум бир тадбирларни амалга оширишга ҳақли. Биз уларнинг ҳуқуқларини қандай таъминлай оламиз?” — деди у.
Яна бир сабаб, вақтинчалик ҳудудидан кўчирилганлар сонининг кўплиги.
“Бу ҳатто жаҳон ташкилотлари гапираётган 7 миллион эмас, агар ички кўчирилганларни ҳам олсак, 14 миллиондан ошади. Қандай қилиб сайловчиларни қисқа вақт ичида қайта рўйхатдан ўтказиш мумкин?” — таъкидлади Подоляк.
Украина расмийси охирги сабаб сайловларни ўтказиш харажатлари масаласи эканини қайд этди. Подоляк келгуси йилда Украинада сайловларнинг ўтказилиши фронтдаги вазиятга боғлиқлигини билдирди.
Маълумки, 29-октябрь куни Украинада Олий Радага сайловлар бўлиб ўтиши керак эди, бироқ ҳарбий ҳолат даврида қонунан бунга йўл қўйилмайди. 2024 йилнинг март ойида эса Украинада президентлик сайловлари ўтказилиши керак.
Бир ҳафта олдин америкалик сенатор Линдси Грем Украинада ҳарбий ҳолат жорий қилинганига қарамай, сайловлар 2024 йилда ўтказилиши кераклигини айтганди. Украина президенти Владимир Зеленский эса уруш пайтида сайлов ўтказиш учун давлат бюджетидан пул ололмаслиги, сайловлар фақат ғарбнинг пулига ўтиши мумкинлигини айтганди.
Изоҳ (0)