Украина 2 миллиард доллар миқдорида қўшимча ҳарбий ёрдам олади, деди АҚШ давлат котиби Энтони Блинкен. Ушбу маблағлар Украина ҳарбий-саноат комплексига сармоя киритиш учун яратилган мудофаа корхоналари фондидан ажратилади.
“Биз етказиб беришни бошладик ва Украинага маълум миқдорда ёрдам етказиб берилди. Бугун мен яна қўшимча 2 миллиард доллар миқдорида маблағ ажратамиз, деб эълон қилмоқчиман”, — деди Блинкен Украина ташқи ишлар вазири Дмитрий Кулеба билан бўлиб ўтган матбуот анжуманида. Бу маблағлар Украинада ҳарбий ишлаб чиқаришни ривожлантириш ва бошқа давлатлардан қурол сотиб олишга йўналтирилади.
24 апрель куни АҚШ президенти Жо Байден Украинага ёрдам бериш учун 61 миллиард доллар ажратишни ўз ичига олган қонун лойиҳалари пакетини имзолаганди, шундан 20 миллиард доллари Америка захираларини тўлдиришга, 14 миллиард доллари қурол сотиб олишга йўналтирилади.
10 май куни Жо Байден Украинага 400 миллион доллар ҳарбий ёрдам кўрсатиш бўйича топшириқ берганди.
Изоҳ (0)