Россия президенти матбуот котиби Дмитрий Песковнинг айтишича, Кремль Грузиянинг бошқа давлатлар мамлакат ишларига аралашишини истамаётганини кўриб турибди. Унинг қўшимча қилишича, Грузия парламентида хорижий агентлар тўғрисидаги қонуннинг қабул қилиниши ва бунинг фонида оммавий норозилик намойишлари мамлакатнинг ички ишлари бўлиб, унга Россия аралашиш ниятида эмас.
“Биз Грузиянинг ички ишларига ташқаридан яширин аралашувни яна бир бор кўряпмиз. Ҳатто у ёки бу қонунни қабул қилсалар, Грузияга қарши санкциялар қўллаш таҳдидларини ҳам эшитамиз, хўш, бу Грузиянинг ички ишларига бевосита аралашиш бўлмаса, бу нима?” — деди Песков.
Дмитрий Песков Грузия парламентида хорижий агентлар тўғрисидаги қонун лойиҳаси кўриб чиқилишини “Грузия раҳбариятининг мамлакатни очиқ аралашувдан ҳимой қилишга бўлган қатъий истаги” деб атади. Шунингдек, у шундай қонунлар дунёнинг аксарият мамлакатларида мавжудлигини айтди.
13 май куни Грузия парламенти қўмитаси хорижий агентлар тўғрисидаги қонун лойиҳасини учинчи ўқишда қўллаб-қувватлади. Қонун лойиҳасига қаршилар ҳар куни Тбилисида норозилик намойишлари ўтказишмоқда.
Сўнгги бир неча кун ичида мамлакат пойтахтида қонун лойиҳаси кўриб чиқила бошланганидан бери энг йирик митинглар бўлиб ўтмоқда. Reuters агентлигига кўра, 11 май куни бўлиб ўтган юришда 50 мингдан ортиқ киши қатнашган.
Изоҳ (0)