Қозоғистонлик миллиардер инглиз футбол клубини сотиб олди

Қозоғистонлик миллиардер Михаил Ломтадзе “Уикомб Уондерерс” футбол клубининг эгасига айланди. Бу ҳақда BBC хабар бермоқда.

Ломтадзега тегишли Blue Ocean Partners Ltd Wycombe компаниясининг 90% улушини сотиб олди. Транзакция суммаси ошкор этилмаган. Илгари клуб америкалик тадбиркор Роб Коуигга тегишли эди.

Михаил Ломтадзе — “Каспи.кз” технологик компанияси акциядори, директорлар кенгаши аъзоси ва бошқарув кенгаши раиси. 48 ёшли тадбиркорнинг бойлиги 5,7 миллиард долларга баҳоланган. У Қозоғистоннинг энг бой бизнесменлари рўйхатида бешинчи ва Forbes миллиардерлари рўйхатида 581-ўринни эгаллаган.

“Уикомб Уондерерс” 1887 йилда ташкил этилган. Ўзининг бутун тарихи давомида клуб Англиянинг қуйи дивизионларида ўйнаган. “Уикомб” ўтган мавсумни 1-лигада (Англия футболининг учинчи дивизиони) ўтказди ва у ерда 10-ўринни эгаллади.

• “Уикомб” клуби тарихидаги асосий муваффақияти Англия кубоги ярим финали (2001) ва Англия Лига кубоги ярим финали (2006) ҳисобланади.
• 2019—20 йилги мавсумда “Уикомб” 1-лига плей-оффида ғалаба қозонди ва ўз тарихида биринчи марта Chempionship’га чиқди.
• Аммо у ерда мустаҳкам жойлаша олмади ва кейинги мавсумда яна 1-лигага қайтиб тушди.