Qozog‘istonlik milliarder ingliz futbol klubini sotib oldi

Qozog‘istonlik milliarder Mixail Lomtadze “Uikomb Uonderers” futbol klubining egasiga aylandi. Bu haqda BBC xabar bermoqda.

Lomtadzega tegishli Blue Ocean Partners Ltd Wycombe kompaniyasining 90% ulushini sotib oldi. Tranzaksiya summasi oshkor etilmagan. Ilgari klub amerikalik tadbirkor Rob Kouigga tegishli edi.

Mixail Lomtadze — “Kaspi.kz” texnologik kompaniyasi aksiyadori, direktorlar kengashi a’zosi va boshqaruv kengashi raisi. 48 yoshli tadbirkorning boyligi 5,7 milliard dollarga baholangan. U Qozog‘istonning eng boy biznesmenlari ro‘yxatida beshinchi va Forbes milliarderlari ro‘yxatida 581-o‘rinni egallagan.

“Uikomb Uonderers” 1887-yilda tashkil etilgan. O‘zining butun tarixi davomida klub Angliyaning quyi divizionlarida o‘ynagan. “Uikomb” o‘tgan mavsumni 1-ligada (Angliya futbolining uchinchi divizioni) o‘tkazdi va u yerda 10-o‘rinni egalladi.

• “Uikomb” klubi tarixidagi asosiy muvaffaqiyati Angliya kubogi yarim finali (2001) va Angliya Liga kubogi yarim finali (2006) hisoblanadi.
• 2019—20-yilgi mavsumda “Uikomb” 1-liga pley-offida g‘alaba qozondi va o‘z tarixida birinchi marta Chempionatshipga chiqdi.
• Ammo u yerda mustahkam joylasha olmadi va keyingi mavsumda yana 1-ligaga qaytib tushdi.