Facebook, Amazon компаниялари, миллиардер Ретклифф, собиқ футболчи Бекҳэм ва араб шайхлари. «Манчестер Юнайтед»ни сотиб олишга даъвогарлар

Дунёнинг бир нечта йирик компанияси ва бир неча шахс «Манчестер Юнайтед»ни сотиб олишга қизиқиш билдирмоқда.

Клуб матбуот хизмати аввалроқ «Манчестер Юнайтед» сотувга қўйилиши борасида музокаралар ўтказишга тайёр эканини маълум қилганди.

Daily Mail хабарига кўра, клубга эгалик қилувчи Глейзерлар оиласи сотувдан 5 миллиард фунтдан кўп ишлаб олмоқчи, улар учун энг мақбул вариант 6—8 миллиард фунт атрофидаги миқдор бўлади.

Дунёнинг йирик IT-компаниялари Amazon ва Facebook, шунингдек, БАА ҳамда Қатардан бўлган амалдорлар ҳам «Манчестер Юнайтед»ни сотиб олишга қизиқиш билдирган.

The Telegraph версияси бўйича, Буюк Британиянинг энг бой кишиларидан бири Жим Ретклифф Манчестер жамоасини сотиб олишга тайёр. Ineos кимё компаниясига эгалик қилувчи 70 ёшли тадбиркорнинг бойлиги 16,3 миллиард долларга баҳоланган.

Қайд этилишича, Ретклифф август ойидаёқ ўзи мухлислик қиладиган клубни сотиб олиш борасида Глейзерлар оиласи билан боғланган. Бироқ у вақтда «Манчестер Юнайтед» эгалари клубни сотиш ниятида эмас эди.

Ineos компанияси «Ницца» ва «Лозанна» футбол клубларига эгалик қилади.

Financial Times’нинг хабар қилишича, «Манчестер Юнайтед» собиқ футболчиси Дэвид Бекҳэм ушбу жараёнда иштирок этиш истагида. Англиялик функционер потенциал харидорлар билан музокаралар ўтказишга тайёр. Бекҳэмнинг ўзи «Манчестер Юнайтед»ни сотиб ололмайди. Бироқ инвесторлар орқали клубнинг йирик аксионерига айланиши мумкин.

Клуб Глейзерлар оиласига тегишли. Америкалик оила 2005 йилда 790 миллион фунт эвазига «Манчестер Юнайтед»ни сотиб олганди. Айни вақтда жамоанинг бозор нархи 1,81 миллиард фунтга тенг. Аввалроқ Глейзерлар клубни сотиш борасида 5 дан 9 миллиард фунтгача бўлган таклифларни кўриб чиқишга тайёрлиги хабар қилинганди.