Европа Иттифоқининг олий суди Россиянинг Украинага бостириб кириши ортидан россиялик миллиардер Роман Абрамовичга нисбатан жорий қилинган санкцияларни ўз кучида қолдирди.
Владимир Путин 2022 йил февраль ойида Россия қўшинларига Украинага бостириб киришни буюрганидан сўнг Евроиттифоқ россиялик амалдорлар ва Абрамович каби кўплаб россиялик тадбиркорларга чекловлар киритди. Шахсий санкциялар жорий этилиши билан бир вақтда Россиянинг юзлаб миллиард долларлик активлари музлатиб қўйилди.
Абрамович Люксембургдаги Европа судига даъво аризаси билан мурожаат қилиб, унга нисбатан санкцияларга норозилик билдирди. У Россиянинг ҳомийси эмаслигини ва Путин билан яқин алоқалари ҳақидаги айбловлар ёлғон эканини даъво қилган.
Миллиардернинг адвокатлари унинг Украинада ўт очишни тўхтатиш, гуманитар коридорлар яратиш ва ҳарбий асирларни алмашиш бўйича музокараларда иштирок этганига ҳам ишора қилган. Аммо якунда Абрамович судда ютқазди.
“Суд Абрамовичнинг даъвосини рад этади ва шу билан унга нисбатан қўлланган чеклов чораларини тасдиқлайди”, — дейилади Европа суди ўз қарорида.
“Челси” футбол клубининг собиқ эгаси, Россия, Исроил ва Португалия фуқароси Абрамович дунёдаги энг нуфузли бизнесменлардан бири саналади. 2021 йил охирида Forbes унинг бойлигини 14,2 миллиард долларга баҳолаган. Бироқ Россиянинг Украинага бостириб кириши ортидан, Британиянинг Times газетасининг ёзишича, Абрамовичнинг бойлиги икки баробарга қисқарган.
Уруш бошида Абрамович Москва ва Киев ўртасидаги музокараларда, кейинроқ болаларни Украинага қайтариш билан боғлиқ алоқаларда воситачилик қилишга ҳаракат қилди.
Изоҳ (0)