“Дўстлар” сериали орқали таниш бўлган америкалик актёр Мэттью Перри Кетамин дори воситасининг ножўя таъсири туфайли оламдан ўтди. Бу ҳақда Deadline нашри Лос-Анжелес суд-тиббиёт экспертизаси хулосасига таяниб хабар бермоқда.
Кетамин — кучли таъсир қилувчи дори воситаси бўлиб, оғриқ қолдириш ва депрессия касалликларини даволашда қабул қилинади. Препарат шифокор томонидан буюрилади. Уни қўллаш Америка озиқ-овқат ва фармацевтика идораси томонидан тасдиқланган.
54 ёшли Перрининг ўлим сабаби бахтсиз ҳодиса деб топилди. У 2023 йил 28 октябрь куни уйининг ваннахонасида ўлик ҳолда топилган. Актёрнинг жасадида қотиллик аломатлари бўлмаган.
У 3 ноябрь куни Лос-Анжелесдаги Forest Lawn Memorial Park’ нинг Warner Bros студиясидан унча узоқ бўлмаган жойга дафн этилди. Маросимда дўстлари ва “Дўстлар” фильмидаги ҳамкасблари Женнифер Энистон, Кортни Кокс, Лиза Кудроу, Мэтт Леблан ва Дэвид Швиммер иштирок этди.
2022 йилда Перри ўзининг “Дўстлар, яқинлар ва битта катта ёмон нарса” номли автобиографик китобини нашр этган, унда гиёҳвандлик билан курашган йиллари тасвирланган.
Изоҳ (0)