KPMG Caucasus and Central Asia жамоаси Ўзбекистонда нақд пулсиз тўловлар ва товарларни бўлиб-бўлиб сотиб олиш сегментлари бўйича тадқиқот ўтказди. Ўрганишлар асосида тузилган прогнозларга кўра, 2027 йилга келиб пул тўловлари ва ўтказмалари ҳажми икки баравар ошиши кутилмоқда.
Тадқиқотда келтирилишича, Ўзбекистонда молиявий технологиялар бозори жадал ўсишда давом этмоқда. 2022 йилда нақд пулсиз тўловлар ва ўтказмаларнинг умумий улуши Ўзбекистон ялпи ички маҳсулотидаги қарийб 58 фоизни, чакана кредитлаш бозори жами йиллик ўсиши эса 2020—2023 йилларда 66 фоизни ташкил этди.
Банкларнинг нақд пулсиз операциялар (тўловлар ва пул ўтказмалари) бозори айланмаси 2022 йилда 36,2 миллиард АҚШ долларига, тўлов ташкилотлариники 10,5 миллиард АҚШ долларига етди. 2027 йилга бориб нақд пулсиз операциялар умумий ҳажми 107 миллиард доллардан 125 миллиард долларгача бўлиши прогноз қилинмоқда.
“Умуман олганда, нақд пулсиз транзакциялар ҳажмининг 22 фоизга ўсиши кутилмоқда. Бу кўп жиҳатдан пул ўтказмаларининг жами йиллик ўсиши билан боғлиқ. 2027 йилга бориб молиялаштириладиган транзакциялар ҳажмининг 4 баробар ўсиши кутилаётган POS молиялаштириш ва муддатли тўловлар бозорида янада динамик ўсиш прогноз қилинмоқда”, — дейди KPMG Caucasus and Central Asia ҳамкори Фаррух Абдуллахонов.
Тадқиқот натижаларига кўра, 2027 йилга бориб POS молиялаштириш ва BNPL (Buy Nоw, Ray Later) бозори умумий ҳажми товар айланмаси бўйича 1,5 миллиард доллардан 2 миллиард долларгача бўлиши прогноз қилинмоқда, йиллик жами ўсиш эса 38-42 фоизни ташкил этади.
“POS молиялаштириш ва муддатли тўловлар бозорида янада кучли ўсиш онлайн сегмент — электрон тижоратда кутилмоқда, гарчи тарихан бўлиб-бўлиб тўлаш кўпроқ офлайн сегментда оммалашган ва ривожланган бўлсада. Электрон тижорат савдо айланмасининг ўсиши билан истеъмолчилар муддатли тўловнинг онлайн хизматларига кўпроқ ишонч билдираётганини кўряпмиз”, — дейди компаниянинг яна бир ҳамкори Виталий Яковлев.
KPMG Caucasus and Central Asia тадқиқотига кўра, сўнгги бир неча йилда инвесторларнинг Ўзбекистондаги молиявий технологиялар бозорига қизиқиши ҳам сезиларли даражада ошган.
Изоҳ (0)