YouTube — штаб-квартираси Сан-Брунода (Калифорния) жойлашган Америка видео алмашиш веб-сайтидир. Бугунги кунда YouTube видеолари рўйхатининг энг юқори поғоналарини асосан мусиқий видеолар ҳамда мультфильмлар эгаллаб келмоқда.
Хусусан, жорий йил апрель ойида Жанубий Кореянинг BlackPink эстрада гуруҳи энг кўп кўрилган видеолар бўйича Гиннес рекордини ўрнатди. BlackPink’нинг YouTube тармоғидаги канали мусиқий каналлар орасида энг кўп кўрилгани маълум бўлди.
2024 йил 10 апрель ҳолатига кўра, BlackPink гуруҳи каналидаги видео кўришларнинг умумий сони 30 миллиарддан ошиб кетди. Шундай қилиб, кореялик ёш поп-юлдузлар канадалик қўшиқчи Жастин Биберни ортда қолдирди.
BlackPink гуруҳи ижрочиларининг канали 2016 йилнинг июнь ойида очилган. Бугунги кунга келиб уларнинг обуначилари сони 93,6 миллион кишини ташкил этади. Қайд этиш лозимки, BlackPink бундан аввал 21 маротаба Гиннес рекордини ўрнатган.
Гуруҳ илгари Буюк Британия альбомлар рейтингида биринчи ўринни эгаллаган биринчи K-pop гуруҳи ва Spotify тизимида дунёдаги энг машҳур поп-мусиқачи қизлар гуруҳи сифатида тан олинган. Гуруҳ 4 нафар аъзодан: Жису, Женни, Роза ва Лиза исмли қизлардан иборат.
Маълумот учун: 2005 йилнинг ноябрида бразилиялик футболчи Роналдиньо иштирокидаги Nike рекламаси 1 000 000 марта кўрилган илк видео бўлган.
Изоҳ (0)