Paramount студияси “Baby Shark” қўшиғи ва “Кичкинтой акуланинг катта шоуси” мультсериали асосида ишланган “Baby Sharkʼs Big Movie” мультфильмининг трейлерини эълон қилди.
Тўлиқ метражли лойиҳа сюжетига кўра, кичкинтой Акула оила аъзолари билан бирга катта шаҳарга кўчиб ўтади ва энг яқин дўсти Уилямнинг ёрдамисиз янги ҳаёт тарзига кўникишга мажбур бўлади. Шу билан бир вақтда денгиз поп-юлдузи Stariana сув ости дунёсининг энг истеъдодли мавжудотига айланиш мақсадида кичкинтой акуланинг мусиқий иқтидорини ўғирлашга ҳаракат қилади.
Мультфильм қаҳрамонларига Карди Би ва унинг турмуш ўртоғи Oффсет, жуфтликнинг қизи ва ўғли, шунингдек Эшли Тисдейл ҳамда Жанубий Кореянинг Enhypen бойз-бенди вакиллари овоз беришган. Мультфильм тақдимоти 8 декабрь куни Nickelodeon ва Paramount+ да бўлиб ўтади.
Маълумот учун, Жанубий Кореянинг Pinkfong лойиҳаси томонидан ижро этилган “Baby Shark” қўшиғи YouTube платформасига 2016 йилда жойлаштирилган ва яшин тезлигида оммалашиб кетган. Клип 2020 йилда платформа тарихида энг кўп кўрилган видео сифатида рекорд қайд этган ва бу борадаги етакчиликни бугунги кунга қадар ҳеч кимга бермай келади. “Baby Shark” қўшиғининг клипи ҳозиргача 13 миллиард марта томоша қилинган.
Изоҳ (0)