Ўзбекистон ва Қатар ўртасида имзоланган солиқ соҳасидаги икки томонлама халқаро шартнома кучга кирди. Бу ҳақда “Дунё” АА хабар берди.
Маълум қилинишича, 2023 йил 6 июнь куни Самарқанд шаҳрида имзоланган “Ўзбекистон Республикаси ҳукумати билан Қатар давлати ҳукумати ўртасида даромад солиқлари бўйича икки ёқлама солиққа тортишни бартараф қилиш ҳамда солиқларни тўлашдан бош тортиш ва бўйин товлашнинг олдини олиш тўғрисида”ги битим 2024 йил 12 февралдан эътиборан кучга кирган.
Мазкур ҳужжатнинг асосий мақсади — Ўзбекистон ва Қатар ўртасида солиқ соҳасидаги икки томонлама муносабатларнинг ҳуқуқий асосларини шакллантириш.
Битим қуйидагиларни назарда тутади:
- икки ёқлама солиққа тортишни бартараф этиш;
- солиқ тўлашдан қочишнинг олдини олиш;
- томонлар ўртасида солиққа тортиш ҳуқуқларини тақсимлаш;
- солиққа тортиш орқали камситишларнинг олдини олиш.
“Ушбу халқаро шартноманинг кучга кириши икки томонлама ҳамкорликни мустаҳкамлайди ва томонларнинг инвестициявий салоҳиятини кенгайтиришга хизмат қилади”, — дейилади хабарда.
Изоҳ (0)