Ўзбекистон Олимпия терма жамоаси ҳамда “Ал-Ваҳда” клуби футболчиси Ҳожимат Эркинов ҳам Осиё Кубоги финал учрашувида қатнашмайди.
Аввалроқ Абдуқодир Ҳусанов финалда иштирок этмаслиги, “Ланс” таркибига қайтиб кетиши ҳақида хабар берилганди. ЎФА матбуот хизмати Эркинов ҳам ҳал қилувчи баҳсда Олимпия терма жамоасига ёрдам бермаслигини маълум қилди.
“ЎФА Қатар майдонларида ўтаётган U-23 Осиё Кубогида барча легионерларимизни терма жамоамизга жалб этишга муваффақ бўлган эди. Хусусан, Абдуқодир Ҳусанов ва Ҳожимат Эркиновнинг клублари билан асосий вазифага қадар — Олимпиада йўлланмасини қўлга киритиш бўйича келишувга эришилган эди. Шу сабабли, ушбу икки футболчи ўз жамоалари таркибидаги навбатдаги муҳим ўйинларга тайёргарлик кўриш учун клублари сафига йўл олмоқда”, — дейилади ЎФА хабарида.
Эркинов мусобақа давомида гуруҳ босқичида Кувайт дарвозасини ишғол қилган эди.
Изоҳ (0)