Футбол бўйича U-23 Осиё Кубоги чорак финалида Ўзбекистон Олимпия терма жамоаси 26 апрель, жума куни Саудия Арабистонига қарши баҳс олиб борди.
Кескин курашларга бой бошланган биринчи бўлимнинг охирида ўзбекистонликлар ҳисобни очди. Ҳусайн Норчаев ажойиб ҳаракатлар амалга ошириб, дарвозани ишғол қилди.
Иккинчи бўлимда ҳам Ўзбекистон футболчилари яхши ҳаракат қилди. 70-дақиқада эса Саудия футболчиси Айман Яҳё қизил карточка олиб, майдонни тарк этди. Қолган дақиқаларда саудияликлар бир киши кам бўлиб ўйнашга мажбур бўлди. 84-дақиқада эса Умарали Раҳмоналиев ҳисобни ишончли кўринишга олиб келди.
Шу тариқа Тимур Кападзе шогирдлари 2:0 ҳисобидаги ғалабани расмийлаштирди ва кейинги босқич масаласини ҳал қилди.
Ўзбекистон U-23 терма жамоаси ярим финалда Индонезияга қарши баҳс олиб боради. Жамоалар ўртасидаги учрашув 29 апрель санасида бўлиб ўтади.
U-23 Осиё Кубоги
Чорак финал
26 апрель, жума
Ўзбекистон U-23 – Саудия Арабистони U-23 2:0
Голлар: 1:0 — 45+2 Норчаев, 2:0 — 84 Раҳмоналиев.
Ўзбекистон U-23: 1. Абдувоҳид Неъматов, 4. Абдуқодир Ҳусанов, 5. Муҳаммадқодир Ҳамралиев, 6. Иброҳимҳалил Йўлдошев, 10. Жасурбек Жалолиддинов, 14. Аббосбек Файзуллаев, 17. Диёр Холматов, 18. Алибек Давронов, 19. Ҳусайн Норчаев, 20. Русланбек Жиянов, 23. Абдурауф Бўриев.
Саудия Арабистони U-23: 2. Муҳаммад Ваҳиб Алшамат, 4. Райан Муҳаммад Ҳамид, 6. Эид Алмуваллад, 8. Файсал Ал Гамди, 9. Абдуллоҳ Радиф, 11. Аҳмад Ал Гамди, 12. Закариа Ҳавсави, 17. Хайтам Муҳаммад Асири, 19. Мешал Ибяни Ҳайруллоҳ, 22. Муҳаммад Салим Алабси, 23. Айман Яҳё.
Изоҳ (0)