Ирландия Буюк Британиядан келаётган ноқонуний муҳожирларнинг катта оқимига тўқнаш келмоқда. Бу ҳақда тегишли манбаларга таяниб, “ТАСС” хабар берди.
Маълум бўлишича, сўнгги кунларда Ирландиядан бошпана сўраб мурожаат қилганларнинг 80 фоизи Буюк Британиядан Шимолий Ирландиянинг қўриқланмаган чегараси орқали мамлакатга кирган.
Мен ҳеч қачон бошқа давлатнинг миграция сиёсати мамлакатимиз барқарорлигига таъсир кўрсатишига йўл қўймайман. Бизнинг мамлакатимиз ҳеч қачон ва ҳеч қандай шаклда бошқаларнинг миграция муаммоларини ҳал қилиш учун туйнук бўлмаган, — деди Ирландия бош вазири Саймон Ҳаррис.
29 апрель куни Ирландия адлия вазири Ҳелен Макенти британиялик ИИВ раҳбари Жеймс Клеверли билан мавжуд вазиятни муҳокама қилиш ниятида. Ирландия Вазирлар Маҳкамаси ноқонуний муҳожирларнинг Буюк Британияга қайтишини осонлаштирадиган қонун лойиҳасини ҳам киритмоқчи.
Британия ҳукуматининг ноқонуний муҳожирларни Руандага жўнатишни кўзда тутган режаси икки йил аввал Борис Жонсон кабинети томонидан тақдим этилган. Ҳозиргача бу амалга оширилмаган, сабаби Британия судлари Руандага депортация қилинган мигрантлар ҳаёти ва саломатлиги хавф остига қўйилиши мумкин, деб ҳисоблаган. Шунингдек, Европа инсон ҳуқуқлари бўйича суд ҳам бунга қарши чиққан.
Вазиятни ҳал қилиш учун Риши Сунак ҳукумати Руанда билан бу имкониятни йўқ қилиш учун янги шартнома имзолаган ва Руандани хавфсиз мамлакат деб эълон қиладиган ҳамда чиқариб юборилганларнинг судда эътирозини чекловчи янги қонун қабул қилган. Лондон ва Кигали ўртасидаги келишувга кўра, қиролликдан чиқариб юборилган ноқонуний муҳожирлар Руанда ёки бошқа хавфсиз учинчи давлатлардан бошпана сўраши мумкин.
Изоҳ (0)