Еврокомиссия 2027 йилгача ЕИ ҳудудида Россия Марказий банкининг музлатилган 208 миллиард евролик активларини қайта инвестиция қилишдан олинган 15 миллиард евролик даромадни мусодара қилмоқчи. Бу ҳақда Еврокомиссар Дидье Рейндерсга таяниб, “ТАСС” хабар берди.
Брюсселдаги матбуот анжуманида Рейндерснинг таъкидлашича, бу пулни мусодара қилишдан олдин кўп босқичлардан ўтиш лозим.
Европада Россиянинг 208 миллиард евролик давлат активлари ҳамда Марказий банк активлари блокланган. Уларнинг аксарияти Бельгияда. Ушбу активлардан тушган даромадлар Украинани қўллаб-қувватлашга қаратилган бўлиши лозим. Бельгия 2023 йилда даромадларни солиққа тортган ва ундан тушган маблағни Украинани қўллаб-қувватлашга йўналтириши мумкин, — деди Рейндерс.
Унга кўра, Еврокомиссия ҳозирда Россия маблағларини мусодара қилишнинг навбатдаги босқичи билан шуғулланмоқда.
Келгуси ҳафталарда биз тушумлардан фойдаланиш учун келишувга эришамиз, деб умид қиламиз. Биз 2027 йилга келиб тахминан 15 миллиард евро даромаддан фойдаланиш мумкинлигини тахмин қилдик, аммо бу албатта фоиз ставкалари ва дивидендларга боғлиқ бўлади, — қўшимча қилган Рейндерс.
У Европа Комиссияси ушбу маблағларни ўзлаштириш учун қандай схемадан фойдаланмоқчи эканлигини очиқламаган.
Аввалроқ Бельгия ҳукумати 2023 йилда Россиянинг музлатилган активлари фойдасидан олинадиган солиқлардан 1,7 миллиард евро олгани, бу эса Украинани қўллаб-қувватлаш учун сарфланишини маълум қилган эди.
Брюссель Россия активларидан тушган даромадни Украинага 2027 йилгача бўлган 50 миллиард евролик ёрдам дастурини молиялаштириш учун ишлатиш ниятида.
Изоҳ (0)