Европа Иттифоқи 2022—2023 йилларда музлатилган Россия активларидан олинган 5 миллиард евро фойдани Украинага ўтказмайди. Бу ҳақда тегишли манбаларга таяниб, Politico хабар берди.
Нашрга кўра, пуллар Брюсселдаги Euroclear қимматли қоғозлар депозитарийсида Москва даъволаридан суғурта сифатида қолади.
Россиянинг музлатилган активлари билан боғлиқ 2022—2023 йиллардаги фойда “оддий бизнес” доирасида олинган фойдадан ажратилган. Биз бу фойдани акциядорларга тақсимламаймиз ва кейинги кўрсатмаларга қадар ушлаб турамиз. Бу маблағлар Украинадаги уруш туфайли марказий қимматли қоғозлар депозитарийлари кўрган харажатлар, хавфлар ҳамда йўқотишларни қоплаш учун ишлатилади, — деб тушунтирди Euroclear.
Украина Адлия вазири Денис Малюська бу фикрга қўшилмайди ва суд ишлари бўйича суғурта учун 5 миллиард евро жуда катта миқдор эканлигини таъкидлаган. У, шунингдек, Euroclear Украинадаги уруш туфайли атиги 34 миллион евро тўғридан тўғри зарар кўрганини айтган.
Еврокомиссия режаларига кўра, Россиянинг музлатилган маблағларидан 2024 йил 15 февралдан кейин олинган даромадлар Украинага ўтказилиши мумкин. Улар бу маблағнинг 90 фоизини Европа тинчлик жамғармаси орқали Киевга қурол сотиб олишга, қолган 10 фоизини эса Украинани тиклашга ишлатмоқчи. Ушбу схема Европа Иттифоқининг барча давлатларидан бир овоздан маъқулланиши керак, аммо Европа Иттифоқида ҳали якуний консенсусга эришилмаган.
Politico’нинг Бельгия ҳукуматидаги манбасига таяниб хабар беришича, февраль ойи ҳолатига кўра, Россия Бельгия қонунчилиги асосида фаолият юритувчи Euroclear компаниясига қарши Россия Марказий банкининг музлатилган маблағларини қайтаришни сўраб 94 та даъво аризаси билан чиққан.
Изоҳ (0)