“AQSH Isroilni qo‘llab-quvvatlaydi, lekin shu bilan birga, G‘azo aholisining azob-uqubatlariga barham berishga intilmoqda” — Blinken

AQSH Isroilni qo‘llab-quvvatlaydi, lekin ayni paytda G‘azo xalqining “dahshatli azob-uqubatlarini” tugatishga intiladi.

Bu haqda AQSH davlat kotibi Entoni Blinken ma’lum qildi.

“Biz Isroilning 7-oktyabrda sodir bo‘lgan voqea hech qachon takrorlanmasligini ta’minlash borasidagi sa’y-harakatlarini qat’iy qo‘llab-quvvatlaymiz. Lekin shu bilan birga, biz G‘azo aholisi har kuni ko‘rayotgan dahshatli azob-uqubatlarga barham berish uchun qo‘limizdan kelganini qilishga qaror qildik”, — dedi Blinken Saudiya Arabistonida bo‘lib o‘tgan Jahon iqtisodiy forumi tadbirida.

AQSH davlat kotibi, shuningdek, Qo‘shma Shtatlar Isroilning G‘azo sektoridagi Rafah shahrida o‘tkazishi mumkin bo‘lgan operatsiyasini qo‘llab-quvvatlamasligini, chunki bu reja tinch aholini himoya qilishni o‘z ichiga olmaganini aytdi.

“Biz Isroilning Rafahdagi yirik harbiy operatsiyasini qo‘llab-quvvatlay olmaymiz”, — dedi u Saudiya Arabistonidagi Jahon iqtisodiy forumi tadbirida.

Amerika diplomatiyasi rahbarining ta’kidlashicha, Vashington operatsiya davomida “tinch aholi himoya qilinishini ishonarli tarzda aytadigan rejani hali ko‘rmagan”.