АҚШдан янги ёрдам бўлмаса, Украина икки йил давомида Россия агрессиясига қаршилик кўрсатиб эришган ҳамма нарса хавф остида қолади. Бу ҳақда АҚШ давлат котиби Энтони Блинкен 29 январь куни Вашингтонга келган НАТО бош котиби Йенс Столтенберг билан учрашувдан сўнг айтиб ўтди.
“(Украинага) қўшимча ёрдам кўрсатишдан бош тортиб, биз барча рақибларимизга эркинлик, демократияни ҳимоя қилишга жиддий ёндашмаслигимиз ҳақида кучли ва нотўғри сигнал юборяпмиз”, — дея Блинкеннинг сўзларини келтиради AFP. “Бу қандайдир тарзда Владимир Путинда Украинадан кўра, биздан кўра узоқроқ туриб бера олиш ҳақидаги фикрни кучайтиради.”
НАТО бош котиби: “Украинанинг муваффақияти аллақачон кутилганидан ошди”
Столтенберг АҚШ давлат котиби билан ўтказган қўшма матбуот анжуманида Украина Россия дастлаб босиб олган ҳудудларининг ярмини қайтариб олиб, унинг муваффақияти кутилганидан ошганини таъкидлади.
“Уларга ёрдам беришни фойдасиз деб ҳисоблаганларга украиналиклар бунинг аксини исботлаган”, — деди НАТО бош котиби.
У Конгресснинг ҳар икки палатасида республикачилар ва демократлар етакчилари билан учрашувда уларни Украинага кўрсатилаётган ёрдам АҚШ ва Европа хавфсизлигини мустаҳкамлашига ишонтиришга уриниб келаётганини қўшимча қилди.
“Агар Путин ғалаба қозонса, бу украиналиклар учун фожиа бўлади, шунингдек, бу дунёни янада хавфлироқ, бизни янада ҳимоясизроқ қилади”, — деди Столтенберг. “Бу бошқа авторитар раҳбарларни, жумладан, Шимолий Корея, Эрон ва Хитойни куч ишлатишга ундайди. Бугун Украинада содир бўлаётган воқеа эртага Тайванда содир бўлиши мумкин”.
ОАВ: Трамп Украинага ёрдамни блокдан чиқаришга қарши
Сентябрь ойининг охиридан бери АҚШ Конгрессининг иккала палатасида Республикачилар партияси вакиллари Украинага демократ Жо Байден сўраган 61 миллиард доллар миқдорида қўшимча ҳарбий ёрдам ажратишни қўллаб-қувватлашдан бош тортиб келмоқда. Октябрь ойида Оқ уй Исроилга ҲАМАСга қарши курашда ёрдам пакетини тақдим этди. Бироқ республикачилар бу ғояга ҳам қарши чиқмоқда ва бошқа нарсалар қаторида охирги пайтларда ноқонуний муҳожирлар оқими кучайган “АҚШнинг жанубий чегарасида хавфсизликни кучайтириш” учун кўпроқ маблағ ажратиш зарурлигини таъкидламоқда.
Охирги бир ой давомида икки партия вакиллари бу масалаларда деярли муросага кела олди. Бироқ 25 январь куни ОАВ АҚШ президентлигига бўлажак сайловларда республикачилардан номзод бўлиши мумкин бўлган Дональд Трампнинг позицияси туфайли келишув таҳдид остида қолгани ҳақида хабар тарқатди. Ассоcиатед Пресс хабарига кўра, Трамп чегара хавфсизлиги нуқтайи назаридан муросага келишни “маъносиз” деб атаган.
Изоҳ (0)