Блинкен Хитойни АҚШ президентлик сайловларига аралашишга уринишда айблади

АҚШ Давлат котиби Энтони Блинкен Хитойнинг АҚШда бўлиб ўтадиган президентлик сайловларига таъсир ўтказиш ва аралашишга уринишларини эълон қилди.

Унинг сўзларига кўра, Қўшма Штатлар бундай ҳаракатлар тўхтатилишига ишонч ҳосил қилмоқчи. Бу масала Хитой етакчиси Си Цзиньпин билан учрашувда муҳокама қилинди, дея аниқлик киритди Блинкен.

“Умуман олганда, биз сайловга таъсир ўтказиш ва, эҳтимол, аралашувга уринишларнинг далилларини қўлга киритдик. Хитойнинг сайловларимизга ҳар қандай аралашуви биз диққат билан кузатадиган нарсалардан биридир ва буни мутлақо қабул қила олмаймиз. Шунинг учун мен бу сафар Хитой сўзларимизни эшитишига ишонч ҳосил қилмоқчи эдим”, — деди АҚШ давлат котиби.

CNN манбаларга таяниб хабар беришича, 2023 йил ноябрида Сан-Францискода бўлиб ўтган саммитда Си Цзиньпин АҚШ президенти Жо Байденга Хитой Америка сайловларига аралашмаслигига ваъда берган эди. Мамлакатлар вакилларининг кейинги учрашувларида, CNN қайд этишича, бу масала қайта-қайта муҳокама қилинган. 

24—26 апрель кунлари Энтони Блинкен Хитойда амалий ташриф билан бўлди. У Хитой ташқи ишлар вазири Ван Йи ва Си Цзиньпин билан музокаралар ўтказди.