Немис бренди ҳисобланган Adidas рақобатчиси Nike’ни (Америка бренди) шимлари дизайнида учта параллел чизиқдан фойдалангани учун муаллифлик ҳуқуқини бузишда айблади. Суд ҳолат юзасидан бундай шимларни Германияда сотишни тақиқлаш бўйича қарор чиқарди, бироқ Nike апелляция шикояти берди. Бу ҳақда Die Zeit хабар қилди.
Дюссельдорф (Германия) Олий ҳудудий судида спорт товарлари ишлаб чиқарувчи Adidas ва Nike ўртасидаги муаллифлик ҳуқуқи юзасидан низо бўйича апелляция жараёни бошланди. Баҳснинг сабаби учта параллел чизиқ ва у Adidas компаниясининг савдо белгиси ҳисобланади. 2022 йилда немис ишлаб чиқарувчилари бир нечта Nike шимларида шунга ўхшаш чизиқларни топган. Шундан сўнг Дюссельдорф суди Nike компаниясига бундай шимларни сотишни тақиқлаган.
Бунга жавобан Nike апелляция шикояти берган, 2023 йил сентябрда суд қарорни тасдиқлаган, бироқ Nike яна апелляция берган. Эндиликда якуний қарор қабул қилиниши лозим. Nike уч чизиқли дизайнни патент ёки муаллифлик ҳуқуқи билан ҳимоя қилиш учун “жуда умумий ва содда” деб ҳисоблайди.
Шунингдек, Nike кўплаб ишлаб чиқарувчилар спорт шимларини ён томонини чизиқлар билан безатиши, бу дизайн маҳсулотнинг маълум бир брендга тегишли эканини кўрсатмаслигини таъкидлади. Иш бўйича қарор 28 май куни қабул қилиниши кутилмоқда.
Сўнгги йилларда Adidas брендининг чизиқлари бўйича муаллиф ҳуқуқига оид баҳслар қайта-қайта юзага келди. 2019 йилда немис компанияси Европа судида ютқазди: Суд уч чизиқли учбурчакдан иборат бўлган Adidas логотипи товар белгиси сифатида рўйхатдан ўтиш учун “етарлича фарқловчи хусусиятларни ўз ичига олмайди” деб қарор чиқарди.
2016 йил худди шу асосларга кўра, Европа интеллектуал мулк идораси Adidas савдо белгисини рўйхатдан ўтказишдан бош тортди. Суд материалларига кўра, товар белгиси фақат такрорланувчи элементлардан иборат бўлиши мумкин эмас.
Изоҳ (0)