Nemis brendi hisoblangan Adidas raqobatchisi Nike’ni (Amerika brendi) shimlari dizaynida uchta parallel chiziqdan foydalangani uchun mualliflik huquqini buzishda aybladi. Sud holat yuzasidan bunday shimlarni Germaniyada sotishni taqiqlash bo‘yicha qaror chiqardi, biroq Nike apellyatsiya shikoyati berdi. Bu haqda Die Zeit xabar qildi.
Dyusseldorf (Germaniya) Oliy hududiy sudida sport tovarlari ishlab chiqaruvchi Adidas va Nike o‘rtasidagi mualliflik huquqi yuzasidan nizo bo‘yicha apellyatsiya jarayoni boshlandi. Bahsning sababi uchta parallel chiziq va u Adidas kompaniyasining savdo belgisi hisoblanadi. 2022-yilda nemis ishlab chiqaruvchilari bir nechta Nike shimlarida shunga o‘xshash chiziqlarni topgan. Shundan so‘ng Dyusseldorf sudi Nike kompaniyasiga bunday shimlarni sotishni taqiqlagan.
Bunga javoban Nike apellyatsiya shikoyati bergan, 2023-yil sentyabrda sud qarorni tasdiqlagan, biroq Nike yana apellyatsiya bergan. Endilikda yakuniy qaror qabul qilinishi lozim. Nike uch chiziqli dizaynni patent yoki mualliflik huquqi bilan himoya qilish uchun “juda umumiy va sodda” deb hisoblaydi.
Shuningdek, Nike ko‘plab ishlab chiqaruvchilar sport shimlarini yon tomonini chiziqlar bilan bezatishi, bu dizayn mahsulotning ma’lum bir brendga tegishli ekanini ko‘rsatmasligini ta’kidladi. Ish bo‘yicha qaror 28-may kuni qabul qilinishi kutilmoqda.
So‘nggi yillarda Adidas brendining chiziqlari bo‘yicha muallif huquqiga oid bahslar qayta-qayta yuzaga keldi. 2019-yilda nemis kompaniyasi Yevropa sudida yutqazdi: Sud uch chiziqli uchburchakdan iborat bo‘lgan Adidas logotipi tovar belgisi sifatida ro‘yxatdan o‘tish uchun “yetarlicha farqlovchi xususiyatlarni o‘z ichiga olmaydi” deb qaror chiqardi.
2016-yil xuddi shu asoslarga ko‘ra, Yevropa intellektual mulk idorasi Adidas savdo belgisini ro‘yxatdan o‘tkazishdan bosh tortdi. Sud materiallariga ko‘ra, tovar belgisi faqat takrorlanuvchi elementlardan iborat bo‘lishi mumkin emas.
Izoh (0)