Россияда Украинадаги уруш ҳақида компьютер ўйини яратилди. Иштирокчилар “Вагнер” асосчиси марҳум Евгений Пригожиннинг топшириғини бажариши керак бўлади. Бу ҳақда Bild хабар берди.
-jpfxdPTZ.jpg)
Ўйин иштирокчилари “Вагнер” сафида жанг қилади, уларга Луганск вилоятидаги Попасная шаҳрини эгаллаш таклиф этилади. “Дўзахдаги энг яхшилар” деб номланган ўйин NoName компанияси томонидан тақдим этилган. Ўйинни яратувчилар уни “замонавий Россиянинг тарихий воқеаларига асосланган ватанпарвар гейм-лойиҳа” деб атаган.
“Ўйинни яратишда биз жангчиларнинг ҳикояларига таяндик ва драмага эътибор қаратдик”, — дейди ишлаб чиқувчилар.
-x0SorcSo.jpg)
Режага кўра, “Вагнер” жангарилари бутунлай вайрон бўлган шаҳарда “Украина нацистлари”ни кузатиб боришлари керак. Украиналиклар маъмурий биноларда, мактабларда, касалхоналарда ва шунга ўхшаш жойларда ўлдирилиши лозим. Ўйиндаги вазифалар Евгений Пригожин томонидан берилган.
Ишлаб чиқарувчилари ўйин ҳукумат ёрдамисиз яратилганини даъво қилмоқда. Мазкур ўйин аллақачон Владимир Соловёвнинг ташвиқот дастурида эълон қилинган.
Эслатиб ўтамиз, аввалроқ Кремль “Йигит сўзи” (“Слово пацана”), “Холоп-2”, “Муз-3” ва бошқа машҳур фильмлар ва сериаллардан Россия президенти Владимир Путиннинг сайловолди кампанияси мақсадида фойдалангани маълум бўлганди. “Важние Истории” ва Meduza нашрлари Россия президенти аппаратининг сиздирилган ҳужжатларини ўрганиш асосида шундай хулоса қилган.
Ҳужжатда бу кинолар ва бошқа лойиҳалар “миллий манфаатларни ҳимоя қилиш”ни таъминлаш, “Россиядаги одамлар ҳаётидаги ижобий ўзгаришлар, ватандошларнинг тарихий ва замонавий ютуқлари, кун қаҳрамонлари тўғрисида билим даражасини ошириш”, шунингдек, “маданий ўзига хослик, анъаналар ва суверенитетни сақлашга” мўлжаллангани ҳақида маълумот берилган.
Кремлга кўра, “Йигит сўзи” “Россиядаги ҳаёт сифати ўзгаришлари” ҳақида гапиради (яъни, 2020 йилларда руслар 1980 йиллардаги совет халқига қараганда яхшироқ яшайди). Сериални суратга олишга Интернетни ривожлантириш институти пул ажратган.
Изоҳ (0)