Буюк Британия ташқи ишлар вазири, ҳамдўстлик ва тараққиёт масалалари бўйича давлат котиби Дэвид Кэмерон Ўзбекистонга ташриф буюрди. “Газета.uz” унинг фикрлари билан бўлишди.
Британия ташқи ишлар вазири Ўзбекистон, Туркманистон, Қозоғистон ва Мўғулистонга сафар уюштирди. Дипломат 22 апрель куни Тожикистонда бўлган. Ташриф мақсади савдо, хавфсизлик, атроф-муҳит ҳамда таълим бўйича алоқаларни кенгайтиришдан иборат.
У Марказий Осиёнинг барча бешта давлатига ташриф буюраётган илк Буюк Британия ташқи ишлар вазири экани, G7 давлатларидаги ҳамкасблари орасида бундай миқёсдаги ташрифни амалга оширганлар кўп эмаслигини қайд этган.
Ўзига хос ноёб меросга эга ушбу минтақа халқлари ҳозир ҳам жадал ўзгаришларни бошдан кечиришда давом этмоқда. Улар ўз суверенитети ҳимоя қилинишини ва чегаралари дахлсизлиги ҳурмат қилинишини истайдиган мустақил давлатлардир. Мен уларнинг ҳар бири билан барчамизга фойда келтирадиган янада мустаҳкам ҳамкорлик ўрнатишни истайман, — дейди Кэмерон.
Британиялик вазир ҳамкорлик доирасида кўплаб ютуқларга эришилгани, хусусан, ўтган йилнинг ўзида Марказий Осиёдан Буюк Британияга махсус дастур бўйича ишлаш учун ўн минглаб мавсумий ишчилар боргани, Uzbekistan Airways ҳар ҳафта Лондонга бир нечта рейсларни амалга оширишига тўхталиб ўтган.
Кэмерон олдинга қадам ташлаш вақти келганини таъкидлаган.
Биз хавф ва ноаниқлик кучайган бир даврда яшаяпмиз. Катта геосиёсий рақобатлар дунёнинг ушбу қисмидаги мамлакатлар учун маълум бир муаммоларни келтириб чиқаради. Глобал технологик ва иқтисодий ўзгаришлар эса барчамиздан ёшларимизнинг фаровонлиги учун уларни керакли кўникмалар билан таъминлашимизни талаб қилмоқда, — дея қўшимча қилган Кэмерон.
Британиялик дипломат минтақадаги ривожланиш дастурларини уч баробарга оширилишини эълон қилди. Унинг таъкидлашича, бундан мақсад — биргаликда фуқаролар учун хавфсизроқ ва яхшироқ шароитлар яратишдир. Кэмерон ўзаро муносабатларни янги даражага олиб чиқиш учун учта устувор йўналиш ҳақида гапирар экан, биринчи бўлиб глобал тартибга урғу берди. У бутун дунёда ушбу тамойилларни ҳимоя қилиш учун биргаликда ишлашга чақирди.
Иккинчи йўналиш – иқтисодий ҳамкорлик, — дейди Кэмерон.
У Буюк Британия кам углеродли, энергия тежамкорлиги баландроқ иқтисодиётлар учун зарур бўлган технология ва сармояларни жалб қилишда ёрдам бериши мумкинлигини айтган:
Ташрифим чоғида минтақадаги юқори салоҳиятли компанияларга сармоя киритиш учун Марказий Осиёда фонд ташкил этилади. Биз Марказий Осиё компанияларини қўллаб-қувватламоқчимиз. Бунда Британия компаниялари ва тажрибаси муҳим роль ўйнайди.
Шунингдек, Кэмерон Британия университетларида чет элликларнинг ўқишини қўллаб-қувватловчи Chevening стипендиялари учун маблағ миқдорини икки баравар оширилиши ва келгуси уч йил давомида минтақа бўйлаб ривожланиш учун 50 миллион фунт стерлинг ажратилишини айтган.
Дипломатга кўра, фуқаролар, жумладан, аёллар ва қизлар учун таълим сифатини ошириш жамиятнинг тўлиқ салоҳиятини амалда қўллаш учун жуда муҳим.
Мен ушбу учта соҳани Ўзбекистон ҳукумати билан муҳокама қилишни интиқлик билан кутяпман. Тошкентга ташрифимдан ва бугунги Ўзбекистонни кўриш насиб қилганидан мамнунман. Олдимизда катта имкониятлар турибди. Биз улардан биргаликда фойдаланишимиз керак, — дейди британиялик дипломат.
Изоҳ (0)