Еврокомиссия Рақамли хизматлар тўғрисидаги қонунни (DСА) бузилиши мумкинлиги сабабли TikTok онлайн-платформаси бўйича иккинчи текширувни бошлади. Бу ҳақда Еврокомиссия ўз веб сайтида маълум қилди.
Текширувга TikTok Lite иловасида фойдаланувчиларга видеоларни томоша қилиш, ёқтириш ва дўстларни таклиф қилиш каби баъзи “топшириқлар”ни бажариш учун балл тўплаш имконини берувчи функция сабаб бўлган.
Еврокомиссияга кўра, ушбу мукофот тизими қарамлик таъсири билан боғлиқ хавфларни синчковлик билан баҳоламасдан ишга туширилган.
17 апрель куни Еврокомиссия TikTokдан TikTok Lite учун хавфларни баҳолаш ҳисоботини талаб қилган. Компания регуляторга ҳужжатларни тақдим этмаган. TikTok 24 соат ичида хавфни баҳолаш ҳисоботини тақдим этиши ва 3 майгача бошқа сўралган маълумотларни топшириши керак. Акс ҳолда, Еврокомиссия жарима солиши ёки Европа Иттифоқида TikTok Lite мукофотлари дастурини тўхтатиб қўйиши мумкин.
Биз TikTok Lite функцияси заҳарли ва айниқса болаларни ўзига қарам қилиб қўйишидан шубҳадамиз”, — деб ёзди Европанинг ички бозор бўйича комиссари Терри Бретон Х ижтимоий тармоғида.
У, агар TikTok ишончли далиллар келтирмаса, Еврокомиссия иловани мукофотлаш дастурини тўхтатиб қўйиши мумкинлигидан огоҳлантирган.
Биз бу қарордан ҳафсаламиз пир бўлди. TikTok Lite мукофот тизими 18 ёшга кирмаганлар учун мавжуд эмас ва видеоларни кўриш учун кунлик чеклов мавжуд. Биз Еврокомиссия билан муҳокамаларни давом эттирамиз, — дея TikTok компанияси вакили ўз норозилигини билдирган.
Изоҳ (0)