Ўзбекистон Ташқи ишлар вазирлиги делегацияси Лондонда қатор икки томонлама учрашувлар ўтказди. Бу ҳақда вазирлик матбуот хизмати хабар берди.
Маълум қилинишича, 7 декабрь куни Лондонда ташқи ишлар вазири ўринбосари Бобур Усмонов Буюк Британия ташқи ишлар, ҳамдўстлик ва тараққиёт масалалари бўйича давлат котибининг парламентар ўринбосари Лео Докерти, Буюк Британия бош вазирининг Афғонистон бўйича махсус вакили Эндрю Маккубри, Парламентлараро иттифоқдаги Британия гуруҳи (БГИПУ) раиси, Буюк Британия парламенти депутати Карен Бредли билан учрашувлар ўтказган.
Музокаралар чоғида икки мамлакат ўртасидаги сиёсий, парламентлараро, савдо-иқтисодий ва маданий-гуманитар алоқаларнинг бугунги ҳолати ва уларни ривожлантириш истиқболлари муҳокама қилинган.
“Сўнгги йилларда Ўзбекистон билан Буюк Британия ўртасидаги муносабатларда ижобий суръат кузатилаётгани қайд этилди. Сиёсий мулоқотни сифат жиҳатидан янги босқичга кўтаришдан ўзаро манфаатдорлик билдирилди”, — дейилади хабарда.
Эслатиб ўтамиз, ноябрь охирларида Ўзбекистон ташқи ишлар вазири Бахтиёр Саидов Буюк Британиянинг ташқи ишлар, ҳамдўстлик ва тараққиёт масалалари бўйича давлат котиби этиб тайинланган Девид Кемерон билан учрашган эди.
Изоҳ (0)