Тошкент вилоятининг Чирчиқ шаҳрида синтетик моддаларни сотмоқчи бўлган шахс ушланди. Бу ҳақда Тошкент вилояти ички ишлар бош бошқармаси матбуот хизмати хабар берди.
Маълум қилинишича, 7 апрель куни Чирчиқ шаҳри ҳудудидан ўтган канал ёқасида ўзини шубҳали тутган шахс тунги хизматга жалб қилинган шаҳар ИИБ патрул-пост хизмати ходимлари эътиборини тортади.
1996 йилда туғилган фуқаро Ғ.М. ходимлар томонидан тўхтатиб текширилганида унинг ёнидан 21 дона сариқ полиетилен пакетларда қадоқланган гиёҳванд моддасига ўхшаш модда борлиги аниқланиб, далилий ашё сифатида ҳужжатлаштирилиб олинган.
Ўтказилган суриштирув давомида у шаҳарнинг Чинара ҳудудига 1 дона, ҳудуд яқиндаги анҳор бўйига 3 дона худди шундай сариқ полиетилен пакетга қадоқланган синтетик моддаларни яширганлиги ва кейинроқ уларни ижтимоий тармоқда (локация) орқали сотмоқчи бўлганлиги аниқланган.
Ҳозирда ҳолат юзасидан Чирчиқ шаҳар ИИБ Тергов бўлими томонидан терговга қадар суриштирув ҳаракатлари олиб борилмоқда.
Изоҳ (0)