15 апрель куни Грузия парламенти йиғилишида депутатлар ўртасида муштлашув келиб чиқди.
Хабарларга кўра, йиғилишда парламент аъзолари хорижий агентлар тўғрисидаги қонун лойиҳасини муҳокама қилган.
Мухолифатдаги “Фуқаролар” партияси етакчиси, депутат Алеко Элисашвили тўсатдан минбарга яқинлашиб, “Грузия орзуси — демократик Грузия” партияси етакчиси Мамука Мдинарадзега мушт туширган. Уларнинг ортидан бошқа депутатлар ҳам жанжалга қўшилди.
2023 йил март ойида “Грузия орзуси” партияси парламентга хорижий агентлар тўғрисидаги қонун лойиҳасини киритган эди. Бу мамлакатда оммавий норозиликларга сабаб бўлди, шу сабабли ташаббус қайтариб олинди.
2024 йил апрель ойида Грузиянинг ҳукмрон партияси парламентга “Хорижий таъсирнинг шаффофлиги тўғрисида”ги қонун лойиҳасини яна киритиш тўғрисида қарор қабул қилганини эълон қилди. Ҳужжат матни ўзгаришсиз қолди, аммо “хорижий таъсир агенти” атамаси ўрнига “хорижий давлат манфаатларини кўзлайдиган ташкилот” тушунчаси киритилди.
Бу ташаббусга Грузия мухолифати, шунингдек, мамлакат президенти Саломе Зурабишвили ҳам қарши чиқмоқда.
Изоҳ (0)