Американинг Apple компанияси энг йирик смартфон ишлаб чиқарувчилар рўйхатида иккинчи ўринга тушиб, биринчи ўринни Жанубий Кореянинг Samsung компаниясига бой берди. Бу ҳақда IDC (Халқаро маълумотлар корпорацияси) тадқиқотига таяниб, Reuters хабар берди.
IDC’га кўра, жорий йилнинг биринчи чорагида iPhone етказиб бериш тахминан 10 фоизга қисқарган. Бу Android смартфон ишлаб чиқарувчилари рақобатининг кучайиши туфайли содир бўлган. Apple йил бошида 50,1 миллион дона iPhone сотган, ўтган йили мазкур кўрсаткич 55,4 миллион донани ташкил этган эди. Хитойда Apple смартфонларини етказиб бериш 2023 йилнинг охирги чорагида ўтган йилга нисбатан 2,1 фоизга камайган.
Январь—март ойларида глобал смартфон етказиб бериш 7,8 фоизга ошиб, 289,4 миллион донани ташкил этган. Samsung улуши 20,8 фоиз, Apple — 17,3 фоиз, Xiaomi — 14,1 фоизга тўғри келган.
Жорий йилнинг бошида ўзининг энг сўнгги флагман смартфонлар қатори Galaxy С24 сериясини тақдим этган Samsung биринчи чоракда 60 миллиондан ортиқ смартфон сотган. Аввалроқ Samsung 2021 ва 2022 йиллардаги эски смартфонлар учун Galaxy АI жорий қилиши хабар қилинганди.
Изоҳ (0)