Ўзбекистон элчиси Виталий Фен Жанубий Кореянинг Hyundai Rotem компанияси президенти Ли Ёнгбени қабул қилди, деб хабар бермоқда “Дунё” АА.
Унда транспорт соҳасидаги ҳамкорлик масалалари, хусусан, Hyundai Rotem компанияси томонидан Ўзбекистонга 6 та юқори тезликда ҳаракатланувчи электропоездларни етказиб бериш истиқболлари муҳокама қилинди.
Ушбу поездларни етказиб бериш бўйича вазифалар президентнинг 2023 йил 10 октябрдаги “Ўзбекистон Республикаси темирйўл транспорт соҳасини тубдан ислоҳ қилиш чора-тадбирлари тўғрисида”ги қарорида кўзда тутилган.
Қайд этилишича, улар нафақат республика темирйўл транспортини ривожлантиришга, балки Тошкентни Самарқанд, Бухоро, Хива ва бошқа тарихий шаҳарлар билан боғлаш ва мамлакат аҳолиси ҳамда сайёҳлар учун қулайликлар яратишга хизмат қилади.
Hyundai Rotem компанияси раҳбарияти ижтимоий соҳадаги ҳамкорлик доирасида Қорақалпоғистондаги таълим масканлари учун компьютер ва “ақлли” доскаларни беғараз ёрдам сифатида беришга тайёрлигини билдирди. Ушбу кўмак Ўзбекистонда бошланғич ва ўрта-махсус таълимдаги ислоҳотларни қўллаб-қувватлаш мақсадида амалга оширилмоқда. Ушбу ускуна ва жиҳозлар Қорақалпоғистон Республикасига жорий йил май ойида етказиб берилиши режалаштирилган.
Мулоқот давомида, шунингдек, Ўзбекистоннинг инвестициявий имкониятлари билан кенг танишиш ва янги ҳамкорлик истиқболларини муҳокама қилиш мақсадида Hyundai Rotem делегацияси 2024 йил 2—3 май кунларига режалаштирилган Тошкент халқаро инвестиция форумида иштирок этиш учун келиши ҳам маълум қилинди.
Учрашув якунида томонлар ўртасидаги ҳамкорликни чуқурлаштиришга йўналтирилган аниқ тадбирлар бўйича келишувга эришилди.
Изоҳ (0)