“O‘zbekiston temir yo‘llari” Hyundai Rotem tezyurar poyezdi dizayn loyihasi bo‘yicha tanlov e’lon qildi.
Kompaniya barcha iste’dodli dizaynerlarni poyezdning o‘ziga xos va jozibali tashqi ko‘rinishini yaratishga taklif qildi.
Tanlov g‘olibi 100 million so‘m miqdoridagi mukofotga ega bo‘ladi. Poyezdda g‘olibning bosh harflari ham tasvirlanadi.
Tanlov shartlari:
- ikkitadan ortiq bo‘lmagan dizayn variantini taqdim etish;
- ishlarni dizayn-nsr@uzrailway.uz elektron manziliga 2024-yilning 12-mayigacha yuborish;
- mavzu satrida “Hyundai Rotem poezd dizayni tanlovi” deb ko‘rsatish;
- aloqa ma’lumotlarini ko‘rsatish (F.I.Sh., telefon raqam).
“O‘z iste’dodingizni namoyon etish va O‘zbekiston temiryo‘llari tarixining bir qismi bo‘lish imkoniyatidan foydalaning”, — deyiladi kompaniya xabarida.
Texnik topshiriqlarni quyidagi havola orqali yuklab olish mumkin.
Ma’lumot uchun, O‘zbekistonga Janubiy Koreyaning Hyundai Rotem poyezdlarini yetkazib berish bo‘yicha vazifalar prezidentning 2023-yil 10-oktyabrdagi “O‘zbekiston Respublikasi temiryo‘l transport sohasini tubdan isloh qilish chora-tadbirlari to‘g‘risida”gi qarorida ko‘zda tutilgan.
Fevral oyida 6 ta yuqori tezlikda harakatlanuvchi shunday elektropoyezdlarni yetkazib berish istiqbollari muhokama qilingandi.
Yettita vagonga ega elektropoyezd 351 ta o‘rindiqqa ega bo‘ladi. Soatiga 250 kilometr tezlikda harakatlana oladi.
Izoh (0)