Анвар Орипов Сурхондарё вилоятининг Қизириқ тумани ҳокими этиб тайинланди. Бу ҳақда вилоят ҳокимлиги матбуот хизмати хабар берди.
Тайинловга қадар у Сурхондарё вилояти ҳокимининг биринчи ўринбосари лавозимида фаолият юритиб келаётганди. Қизириқ туманининг аввалги ҳокими Шерзод Ражабов унинг ўрнига ҳокимнинг молия-иқтисодиёт ва камбағалликни қисқартириш масалалари бўйича биринчи ўринбосари лавозимини эгаллади.
Анвар Орипов 1985 йилда Термизда туғилган. 2007 йилда Ўзбекистон Миллий университетини тамомлаган, шунингдек, 2007—2010 йилларда Буюк Британиянинг Лондон шаҳри Пимлико академияси инглиз тили курслари тингловчиси бўлган. Маълумоти бўйича мутахассислиги иқтисодчи.
Меҳнат фаолияти давомида Тошкент вилояти ташқи иқтисодий алоқалар, инвестициялар ва савдо бошқармаси, Ташқи иқтисодий алоқалар, инвестициялар ва савдо вазирлиги, “Ўзагроэкспорт”, Вазирлар Маҳкамасида турли лавозимларда, шунингдек, Сурхондарё вилояти ҳокими ўринбосари — вилоят инвестициялар ва ташқи савдо бошқармаси бошлиғи лавозимларида меҳнат қилган.
Изоҳ (0)