Туркия Миллий мудофаа вазирлиги 13 апрель куни Туркия хавфсизлик кучлари Ироқ шимолида Курдистон ишчи партиясига алоқадор тўрт нафар террорчини йўқ қилганини маълум қилди. Бу ҳақда батафсил Anadolu нашри хабар берди.
“Қуролли кучларимиз махсус ҳарбий амалиёт ҳудудида 3 нафар Курдистон ишчи партияси террорчисини, Ироқ шимолидаги Ҳакурк ҳудудида эса 1 нафар террорчини йўқ қилди”, — дейилади вазирлик хабарида.
Туркия расмийлари Ироқ шимолидаги аксилтеррор операция ҳали давом этишини маълум қилган. Мамлакат жануби-шарқий ҳудудларида хавфсизлик тадбирлари кучайтирилиши маълум қилинган.
“Терроризмга қарши курашимиз самарали ва қатъий давом эттирилмоқда”, — дейилади расмий хабарда.
Курдистон ишчи партияси Туркия, АҚШ ва Европа Иттифоқи томонидан террорчи ташкилотлар рўйхатига киритилган. Ушбу партия Туркияга қарши қарийб 40 йилдан бери террор кампанияси олиб бориши айтилади. Ташкилот уюштирган терактларда шу пайтга қадар Туркия ҳудудида 40 минг нафардан ортиқ киши, жумладан, аёллар, болалар ва гўдаклар ҳалок бўлган.
Туркия ҳукумати 2022 йилнинг апрель ойида Ироқнинг шимолидаги Метина, Зап ва Туркия чегарасига яқин Avasин-Басян ҳудудларида Курдистон ишчи партиясининг бошпаналарини нишонга олиш учун махсус операция бошлаган эди.
Изоҳ (0)