Франция ҳукумати 12 апрель куни ўз фуқароларини Эрон, Ливан, Исроил ва босиб олинган Фаластин ҳудудларига саёҳат қилишдан “мутлақ тийилиш”га чақирди. Бу ҳақда CNN нашри хабар берди.
Хабарда айтилишича, Яқин Шарқда сиёсий таранглик кучайиши Париждаги ҳукуматнинг ўз фуқаролари хавфсизлиги борасидаги хавотирларини кучайтирган. Франция Эрон ва Исроил тўғридан-тўғри тўқнашиш арафасида эканлигини маълум қилган.
Франция давлат идоралари Яқин Шарқда бўлиб турган Франция фуқароларига бир қанча тавсиялар юборган. Саёҳатни тўхтатиб туриш ва ҳудудни тарк этиш тавсия қилинган.
Эрон пойтахти Теҳрондаги дипломатик ходимлар оилалари Францияга қайтишни режалаштираётгани маълум қилинган. Давлат хизматчилари учун ҳам ҳозирча юқорида айтилган мамлакатлар ва ҳудудларда иш фаолияти олиб бориш тўхтатилган.
Яқин Шарқдаги манбалар вазият қалтислашаётганидан хабар берган. Ғарб ташкилотлари Эрон ҳужуми 24 соат ичида содир бўлиши мумкинлигидан огоҳлантирган.
Ўтган ҳафтада Исроилнинг Суриядаги Эрон элчихонасига ҳужуми натижасида Эрон олий ҳарбий қўмондонларидан бири ҳалок бўлганидан сўнг Теҳрон ёки унинг ишончли вакиллари томонидан потенциал ўч олиш учун тайёргарлик кучайган. АҚШ расмийлари икки кундан бери Исроил билан боғланиб, ҳужум ҳақида огоҳлантириб келаётгани айтилади. Аммо Эрон қачон ва қандай тарзда, қайси объектларга зарба беришни режалаштиргани аниқ эмас.
Изоҳ (0)