Ўзбекистонда халқаро стандартлар асосида 15 та мактаб қуриш бўйича Европа тикланиш ва тараққиёт банки билан ўзаро келишувга эришилди. Бу ҳақда Мактабгача ва мактаб таълими вазирлиги хабар берди.
Қайд этилишича, Самарқанд шаҳрида ўтказилаётган Европа тикланиш ва тараққиёт банки Бошқарувчилар кенгашининг 32 йиллик йиғилишида Мактабгача ва мактаб таълими вазирлиги, Иқтисодиёт ва молия вазирлиги ҳамда ЕТТБ ўртасида мазкур лойиҳалар ижросига доир уч томонлама Техник ёрдам бериш шартномаси имзоланган.
Таъкидланишича, бу борадаги ўзаро ҳамкорлик ишлари 2021 йил Тошкент шаҳрида ўтказилган Ўзбекистон иқтисодий форуми доирасида бошланган. Ҳамкорлик доирасида республика ҳудудларида босқичма-босқич давлат-хусусий шериклик асосида янги давлат умумтаълим мактаблари фаолияти йўлга қўйилиши, уларга хусусий шериклар томонидан хизмат кўрсатилиши ва таъмирланиши ҳамда бугунги кунда фаолият юритаётган давлат умумтаълим мактабларини реконструкция қилиш, қўшимча бинолар қуриш ва таъмирлаш ишлари амалга оширилиши режалаштирилган.
Жараённинг дастлабки босқичи сифатида Европа ривожланиш ва тараққиёт банки мутахассислари томонидан грант олиш ва маслаҳатчиларни ёллаш бўйича ички таҳлиллар ўтказилган ҳамда мамлакатнинг Наманган ва Фарғона вилоятларидаги 15 та мактаб лойиҳага қамраб олинган. Лойиҳанинг капитал қиймати 55–75 миллион долларни ташкил этади.
Бундан олдин Европа тикланиш ва тараққиёт банки Қорақалпоғистонда 100 МВт қувватга эга шамол электр станцияси қурилишини молиялаштириш учун ACWA Power Wind Karatau корхонасига 19,3 миллион доллар миқдорида кредит ажратиши маълум бўлганди. Шунингдек, банк Uzbekistan Airports АЖга Ўзбекистон халқаро аэропортларида аэропорт ускуналарини модернизация қилиш учун 28 миллион еврогача бўлган узоқ муддатли молиялаштиришни тақдим этади.
Изоҳ (0)