Тошкент шаҳри ва вилоятида Осиё тараққиёт банки ҳамкорлигида 13 та мактаб қурилади

Тошкент шаҳри ва вилоятида 2023—2024 йилларда Осиё тараққиёт банки ҳамкорлигида 13 та мактаб қурилади. Бу ҳақда президентнинг 25 майда имзоланган тегишли қарорида белгиланди.

Ҳужжатга кўра, ўқувчиларга сифатли таълим олиши учун зарур шарт-шароитларни яратиш мақсадида Тошкент шаҳрининг Янгиҳаёт туманида (1 та), Тошкент вилоятининг Зангиота (5 та), Ўртачирчиқ (2 та), Қибрай (3 та), Тошкент (2 та) туманларида давлат-хусусий шерикчилик асосида халқаро стандартларга жавоб берадиган мактаблар қурилади.

Бунинг натижасида 13 860 та қўшимча ўқувчи ўрни, 1 300 та янги иш ўринлари яратилади. Тошкент вилоятидан пойтахтга қатнаб ўқийдиган ўқувчилар сони 20 фоизга қисқаради.

Қарорда белгиланишича, Республиканинг бошқа ҳудудларида ҳам давлат-хусусий шерикчилик асосида мактаблар ташкил этиш чоралари кўрилади.

18 май куни Европа тикланиш ва тараққиёт банки билан Наманган ва Фарғона вилоятларида 15 та мактаб қуриб бериш бўйича келишувга эришилганди.