Ҳомиладорликнинг биринчи триместрида рациондан қандай маҳсулотлар ўрин олиши керак?

Биринчи триместрда ҳомиладор аёлнинг тўғри овқатланиши жуда ҳам муҳимдир, чунки бу даврда ҳомила фаол тарзда шаклланади. Айниқса, бўлажак онада жиғилдон қайнаши ёки токсикоз кузатилса, парҳезга риоя қилиши керак, деб ёзади Wday.

Ҳомиладор аёлнинг рациони қандай бўлиши керак?

Ҳомиладор аёл ҳамма ўйлаганидек икки карра кўп овқатланмаслиги керак. Ҳомилага калория эмас, балки озуқа моддалари керак. Озиқ-овқат соғлом ва витаминларга бой бўлиши шарт. Биринчи триместрда парҳезга риоя қилиш муҳимдир. Озиқ-овқатнинг энергия қиймати 2700 Ккалдан ошмаслиги лозим.

Овқатланиш бўйича тавсиялар:

• тез-тез, оз-оздан кунига 5-6 мартагача овқатланиш;
• охирги овқатни ётишдан 2-3 соат олдин истеъмол қилиш;
• қайнатилган, буғда пиширилган овқатларни истеъмол қилиш, қовурилганлари ҳазм қилиш тизимини зўриқтиради;
• кунига 5-6 граммдан кўп бўлмаган туз истеъмол қилиш;
• овқатни илиқ ҳолатда истеъмол қилиш;
• кунига 1,5 литрдан кўп бўлмаган суюқлик ичиш.

Рацион ҳомиладор аёл 100-120 грамм оқсил, 350 грамм углеводларни ва 75 грамм ёғни оладиган тарзда ишлаб чиқилиши керак.

Қандай маҳсулотлар истеъмол қилиш мумкин?

Биринчи триместрда кўп клетчатка керак бўлади, у ичак фаолиятини рағбатлантиради. Кальций, ёд, темир, рух, фосфор, селен, B, D, E витаминлари, фолий кислотаси ҳам муҳим аҳамиятга эга. Бундан ташқари, бошқа озиқ моддалар керак, шунинг учун рацион хилма-хил бўлиши керак.

Фойдали маҳсулотлар:

• мева ва сабзавотлар;
• денгиз балиқлари;
• сутли маҳсулотлар;
• ёғсиз гўшт — қуён, бедана, мол гўшти;
• гречка, жўхори уни, тариқ, арпа ва буғдой;
• денгиз карами;
• ўсимлик мойи;
• ёнғоқ;
• тухум, лекин ҳафтасига 2 донадан кўп эмас.

Шунингдек, ҳомиладор аёл янги сиқилган шарбатлар, мевали ичимликлар, резаворлардан компотлар ичиши керак.

Нималар истеъмол қилиш мумкин эмас?

Оддий углеводларни ўз ичига олган маҳсулотларни истеъмол қилмаслик лозим. Улар бола учун фойдали эмас, балки фақат вазн ортишига ҳисса қўшади. Ширинлик, шоколад ва шакар истеъмол қилишни чеклаш лозим. Хамир ва ун маҳсулотларини кўп тановул қилмаслик лозим. Бўёқлар, таъм стабилизаторлари ва консервантларни ўз ичига олган зарарли маҳсулотлар умуман тақиқланади.

Фастфуд, дудланган гўшт, колбаса, сосиска, майонез, кетчуп, соуслардан воз кечиш керак. Бу рўйхатга чипс ва кракерлар, гўшт ва балиқ консервалари ҳам киради. Газланган ичимликлар ва аччиқ қаҳвалардан воз кечиш тавсия этилади.

Ҳомиладорлик даврида тўғри ва тўйимли овқатланиш чақалоқ нормал ривожланишининг калитидир. Нотўғри овқатланиш токсикозга ва ҳатто бола тушишига олиб келиши мумкин.