Сербияда президент Вучич партияси парламент сайловларида ғалаба қозонганидан сўнг норозилик намойиши бўлиб ўтди (видео)

Белградда 18 декабрь куни кечқурун мухолифат тарафдорлари парламент ва маҳаллий сайловлар натижаларини бекор қилишни талаб қилиб, норозилик акциясини ўтказди. Сайловда президент Александр Вучичнинг Сербия прогрессив партияси (СПП) ғалаба қозонганди.

Акцияни “Сербия зўравонликка қарши” мухолифат коалицияси ташкиллаштирди. Намойишчилар Белград шаҳар ассамблеяси биносидан Республика сайлов комиссияси (РСК) биносигача юриб борди.

Мухолифат вакиллари овоз бериш пайтида сохталаштиришлар бўлганини даъво қилиб, сайлов натижаларини тан олишдан бош тортди. Улар, хусусан, Белградда пойтахтда истиқомат қилмайдиган 40 мингдан ортиқ одам шаҳар ассамблеясига сайловларда СПП фойдасига ноқонуний овоз берганини даъво қилмоқда.

Намойишчилар сайлов комиссияси биносига тухум, помидор ва ҳожатхона қоғозларини улоқтирди. Кичик гуруҳ намойишчилари РСК биноси олдидаги хавфсизлик деворини бузиб ўтишга уринган, бироқ мухолифат етакчилари йиғилганларни “провокацияларга берилмаслик” ва хотиржамликни сақлашга чақирган. “Озодлик” радиосига кўра, намойиш тўрт соат давом этган, шундан сўнг унинг иштирокчилари тарқала бошлаган.

Huge protest in Belgrade against the largely manipulated elections that took place yesterday.

Enraged citizens are calling for the Belgrade vote to be rerun following reports on massive irregularities, incl. illegal polling stations for voters from abroad.pic.twitter.com/EGBnEbncvN

— Jakub Bielamowicz (@KubaBielamowicz) December 18, 2023

Мухолифат етакчилари Мирослав Алексич (Халқ партияси) ва Мариника Тепич (Озодлик ва Адолат партияси) очлик эълон қилди, уларнинг айтишича, очлик овоз бериш натижалари бекор қилинмагунча давом этади.

Сербия давлат каналига кўра, акцияда 1 600 га яқин одам қатнашган. Россиянинг “ТАСС” агентлиги Белграддаги мухбирига таяниб, “минглаб” намойишчилар ҳақида ёзди.

Маълумот учун Сербиядаги парламент сайловларида, дастлабки ҳисоб-китобларга кўра, ҳукмрон ўнг қанот популистик Сербия прогрессив партияси 46,72 фоиз овоз тўплади. “Сербия зўравонликка қарши” мухолифат блоки 23,56 фоиз, Сербия Социалистик партияси 6,56 фоиз овоз олди. Шу тариқа, Вучичнинг партияси парламентдаги 250 ўриндан 127 тасини оладиган бўлди.

Европада Хавфсизлик ва Ҳамкорлик Ташкилоти (ЙХҲТ) вакиллари ОАВнинг мухолифатга нисбатан тарафкашлиги, Александр Вучичнинг таъсири ва овоз беришдаги қонунбузарликлар туфайли сайловларда “адолатсиз устунлик” бўлганини айтди.

Ўз навбатида, Германия ташқи ишлар вазирлиги Европа Иттифоқига номзод мақомига эга бўлган давлат учун бундай қонунбузарликларни “номақбул” деб атади.