24 декабрь куни кечқурун Белград парламент биноси яқинида бир ҳафта олдин ўтказилган парламент ва маҳаллий сайлов натижаларини бекор қилишни талаб қилиб, бир неча минг киши ҳукуматга қарши намойиш ўтказди. Мазкур бинода республика сайлов комиссияси жойлашган.
Мухолифат намойишига “Сербия зўравонликка қарши” блоки етакчилари Мариника Тепич ва Мирослав Алекшич бошчилик қилди. Акция чоғида намойишчилар шаҳарнинг марказий кўчаси, парламент жойлашган кўча ва ундан 100 метр узоқликда Сербия президенти Александр Вучичнинг қароргоҳи жойлашган кўчани тўсиб қўйди. Шаҳар парламентига кираверишда йиғилганлар “Вучич — ўғри!” деб ҳайқирди, дейилади Reuters хабарида.
Намойишчилар парламент биносига бир неча бор бостириб киришга уриниб, дераза ва эшикларга зарар етказган. Бинога тош ва бошқа нарсалар улоқтирилган. Ички ишлар вазирлиги намойишчиларни “бинога кирмасликка” чақирган. Полиция намойишчиларга қарши кўзни ёшлатувчи газ ва қалампир баллонларини ишлатиб, уларнинг ичкарига киришига тўсқинлик қилган.
Намойишлар чоғида Александр Вучич давлат телевидениеси орқали фавқулодда мурожаат йўллади. Президент ўз қароргоҳидан туриб сербларга гапирар экан, минтақада кўпчилик “муваффақиятли инқилобни нишонлай бошлаганини, бироқ расмийлар “Сербия эркинлигини сақлаб қолишини” айтди. Вучичнинг сўзларига кўра, бошқа давлатларнинг разведка хизматлари расмий Белградни яқинлашиб келаётган норозилик намойишлари ҳақида огоҳлантирган.
“Хусусан, Россия бундай маълумотларни расмийларга тақдим этди”, — деди Сербия бош вазири Ана Брнабич.
Вучичнинг халққа мурожаатидан сўнг, Брнабич сингари кўплаб серб сиёсатчилари мамлакат Майданга (2013—2014 йилларда Киевда бўлиб ўтган Майдан воқеалари назарда тутилмоқда, бунинг натижасида Украинада ҳокимият алмашганди — “Дарё” изоҳи) тайёргарлик кўраётгани ҳақида гапира бошлади. Россия Ташқи ишлар вазирлиги расмий вакили Мария Захарованинг айтишича, “коллектив Ғарб Майдан тўнтариши усулларидан фойдаланиб, Сербиядаги вазиятни қўзғатмоқчи”.
Сербия полицияси маҳаллий вақт билан тахминан 22:00 да (Тошкент вақти билан 02:00) намойишчиларни парламент биносидан узоқлаштиришга муваффақ бўлди. Кечқурун полиция 38 кишини ҳибсга олди, аммо қўлга олинганларнинг умумий сони кўпроқ бўлиши мумкин. Ана Брнабичнинг маълум қилишича, намойишлар чоғида 30 дан ортиқ полициячи яраланган, улардан бирининг жароҳати оғир. Сербия мухолифати полицияни намойишчиларга шафқатсиз муносабатда бўлганликда айблади.
Сербия Миллий хавфсизлик кенгашининг фавқулодда йиғилишидан сўнг Александр Вучич кечқурун иккинчи марта мамлакат аҳолисига мурожаат қилди. Президент полиция ҳибсга олишда давом этишини ва тартибсизликларга алоқадорларнинг барчасини топишини айтди.
“Улар ҳеч қаерга яширина олмайди. Сиёсий инжиқлик туфайли Сербия давлатини вайрон қила олмайсиз. Демократия ва фуқароларнинг сайловолди иродасини йўққа чиқара олмайсиз”, — деди Вучич.
“Сербия зўравонликка қарши” мухолифат блоки тарафдорлари мамлакатда 17 декабрь куни бўлиб ўтган парламент сайловларининг эртасига норозилик намойишларини бошлаганди.
Республика сайлов комиссияси маълумотларига кўра, навбатдан ташқари парламент сайловларида Вучичнинг ҳукмрон Сербия прогрессив партияси 46,72 фоиз овоз олган. Иккинчи ўринни 23,56 фоиз овоз билан марказий чап мухолифатнинг “Сербия зўравонликка қарши” альянси, учинчи ўринни Сербия Социалистик партияси (6,56 фоиз) эгаллади. Шу тариқа, Вучичнинг партияси парламентдаги 250 ўриндан 127 тасини оладиган бўлди.
Европада Хавфсизлик ва Ҳамкорлик Ташкилоти (ЙХҲТ) вакиллари ОАВнинг мухолифатга нисбатан тарафкашлиги, Александр Вучичнинг таъсири ва овоз беришдаги қонунбузарликлар туфайли сайловларда “адолатсиз устунлик” бўлганини айтди.
Изоҳ (0)