Исроил мудофаа кучлари 8 апрель куни Ливан ҳудудига уюштирган ҳужумда “Ҳизбуллоҳ” гуруҳининг қўмондонларидан бири ҳалок бўлди. Бу ҳақда CNN нашри хабар берди.
Хабарга кўра, Исроил мудофаа кучлари Ливан жанубидаги бир қатор нуқталарга зарба берган. Ҳужумларда Ливан “Ҳизбуллоҳ”ининг икки нафар аскари ҳамда ташкилот таркибидаги Ал-Радван махсус операциялар бўлинмаси қўмондони Али Аҳмад Ҳусайн ҳалок бўлган.
Қўмондоннинг ўлимини “Ҳизбуллоҳ” расмийлари ҳам расман тасдиқлаган. Қўмондон вафотига Исроилнинг кутилмаган ҳужуми сабаб бўлгани айтилган.
Ушбу воқеа “Ҳизбуллоҳ” раҳбарияти вакили вафот этиши билан боғлиқ иккинчи ҳолатдир. Март ойи бошида ҳам Ливан жанубидаги ҳужумларда гуруҳ етакчиларидан бири йўқ қилингани Исроил ҳарбий маъмурияти томонидан маълум қилинган эди.
Ливан Миллий ахборот агентлиги маълумотларига кўра, Исроилнинг сўнгги ҳужуми ҳудуддаги биноларга катта зарар етказган. 10 дан ортиқ оила уй-жойидан айрилган.
Изоҳ (0)