Дания Украинага 40 миллион крон (5,8 миллион доллар) миқдорида навбатдаги молиявий ёрдам берди, мазкур маблағ Россия қуролли кучларининг йирик ҳужумларидан кейин энергетика инфратузилмасини тиклашга сарфланади. Бу ҳақда Дания Ташқи ишлар вазирлиги пресс-релизда маълум қилди.
“Ҳужумлар давом этаётганига ва муҳим энергия инфратузилмаси вайрон бўлишига қарамай, Украина бу қишни жуда яхши тарзда ўтказди. Сўнгги ҳафталарда Россия Украинанинг энергетика инфратузилмасига мақсадли ҳужумларни кучайтиришга қарор қилди. Бу эса энергетика тизимидаги сезиларли инқирозларга олиб келмоқда. Дания томонидан биз 40 миллион крон ажратмоқдамиз, бу эса инфратузилмани тиклашга ёрдам беради”, — дейилади глобал иқлим сиёсати вазири Ден Йоргенсен пресс-релизида.
Дания Украина компаниялари ва коммунал хизматларига асбоб-ускуналар сотиб олиш ва етказиб беришни мувофиқлаштирувчи жамғарма орқали вайрон бўлган энергетика объектларини тиклаш учун ёрдам кўрсатмоқда.
Изоҳ (0)