Италия молия полицияси Европа Иттифоқининг пандемиядан кейинги тикланиш жамғармасидан нотўғри фойдаланиш бўйича фирибгарликда гумонланаётган 22 кишини ҳибсга олди, дея хабар берди Politico.
Европа Иттифоқи прокурорларининг сўровига биноан, полиция 8 нафар шахсни ҳибсга олган ва яна 14 нафари уй қамоғига маҳкум қилинган.
Полиция шунингдек, уй ва корхоналарда рейд ўтказиб, активларни, жумладан, квартиралар ва виллалар, криптовалюта, Rolex соатлари, олтин ва заргарлик буюмлари, шунингдек, Lamborgini, Porsche ва Audi Q8 автомобилларини мусодара қилган ва музлатиб қўйган.
Италия Европа Иттифоқининг COVID’дан кейинги иқтисодий тикланиш фондининг 191,5 миллиард евро миқдоридаги грантлар ва кредитларни бошқарувчи энг катта бенефициари ҳисобланади.
Полициянинг таъкидлашича, даъво қилинган фирибгарлик ўн миллионлаб евролик лойиҳалар учун маблағларни таъминлаш тажрибасига эга мутахассислар томонидан амалга оширилган.
Гуруҳ сохта ҳужжатларни ишлаб чиқариш учун ҳамкорлик қилмайдиган мамлакатларда жойлашган булутли серверлар, криптоактивлар ва сунъий интеллект каби илғор технологиялардан фойдаланган ҳолда жиноятни амалга оширган.
Италия тикланиш фондини бошқариш бўйича махсус прокурор назорати остида бўлиб, маблағлардан фойдаланиш бўйича 179 та тергов иши очилган.
Изоҳ (0)