Жаҳон соғлиқни сақлаш ташкилоти (ЖССТ) COVID-19 инфекциясини юқтирмаслик учун ниқоб тақиш ва ижтимоий масофани сақлашга қайтишни маслаҳат бермоқда. 5 январь куни ЖССТ бош директори Тедрос Адҳаном Гебрейесус Twitter’да (Х) жойлаган постида эҳтиёт бўлишга чақирди.
“COVID-19, грипп ва бошқа патогенлар келтириб чиқарадиган нафас йўллари касалликлари кўплаб мамлакатларда бир неча ҳафта давомида ўсиб бормоқда ва сўнгги байрамлардан кейин ҳам давом этиши кутилмоқда”, — дейилади постда.
ЖССТ раҳбари ниқоб, эмлаш ва тест каби самарали ҳимоя воситаларини эслатди.
“Тестдан ўтинг ва агар зарур бўлса, ёрдам сўранг, чунки COVID-19 ни даволаш оғир касаллик ва ўлимнинг олдини олиши мумкин. Таъсирни камайтириш учун ниқоблардан фойдаланиш, хоналарни шамоллатиш ва масофа сақлашни давом эттиринг, ўзингиз ва яқинларингиз COVID-19 ҳамда гриппга қарши эмланинг”, — деб тавсия қилди Гебрейесус.
Аввал ЖССТ 20 ноябрдан 17 декабргача дунё бўйлаб 850 мингдан ортиқ коронавирусга чалиниш ҳолатини қайд этганди. Бу аввалги 28 кунлик даврга нисбатан 52 фоизга кўпдир. Касалланишнинг янги ҳолатлари Россияда кузатилган.
Изоҳ (0)