“Толибон” Афғонистонда ҳар қандай партия фаолиятини ноқонуний деб эълон қилди

“Толибон” Афғонистонда партия номи остидаги ҳар қандай фаолиятни ноқонуний деб эълон қилди. Бу ҳақда Hasht-e Subh Daily хабар берди.

“Толибон” Адлия вазирлиги тегишли баёнот билан чиқиб, вазирликдаги сиёсий партиялар фаолияти тугатилиб, ташкилот таркибидан чиқарилганини маълум қилди. Вазирлик аввалги ҳукуматда рўйхатдан ўтган бир қатор сиёсий партия амалдорлари ўз партияси номидан фойдаланмоқчи бўлганини таъкидлади.

“Адлия вазирлиги Афғонистонда партия номи остидаги ҳар қандай фаолиятни ноқонуний деб ҳисоблайди ва бундай ҳаракатлар такрорланса, қонунбузарларга қарши қонуний ва шариат асосида иш олиб бориши ҳақида огоҳлантиради”, — дейилади баёнотда.

Таъкидланишича, ҳукумат даврида фаол бўлган ижтимоий ташкилотлар фаолияти тўхтатилган, хайрия жамғармалари ва бирлашмалар “Толибон” Адлия вазирлигининг расмий лицензияси ва принциплари асосида фаолият юритиши мумкин.

Бундан рухсатномасиз фаолият юритаётган хайрия жамғармалари ва бошқа ижтимоий муассасаларни ўз фаолиятини тўхтатиш ҳақида огоҳлантирган. Айни пайтда “Толибон” Адлия вазири вазифасини бажарувчи Абдул Ҳаким Шараи ўзининг сўнгги баёнотида партия номини олиш жиноят экани ва уларнинг режимида партияларга ўрин йўқлигини айтди.